Аскетика. Том I

Ответ. Хотяй путем Божиим ходити, да не взыщеши себе чести. Путь же Божий кий есть, разве точию да повержет кто волю во всех созади, и еже имети себе последнейшаго всех и малейша всех? Таковый может ходити путем сим. Аще бо кто не отсечет воли своея и не положит упования своего на Господа, не может. И на нем исполняется слово Евангелия: «Ищите и обрящете. Толцыте, и отверзется вам» (Мф. 7, 7). Жизнь и спасение сие есть: еже стяжати поревнуй. Ин бо путь несть, точию сей. Брате, да не будеши поруган.

Вопрос 540. Что сотворю, отче, яко брани утесняют мя и крепятся на мя? И рцы ми, кое есть знамение, еже имети мне упование на Бога: и кое есть знамение прощения грехов? И како есть, еже седети мне по Богу?

Ответ. Брате, время браней время делания есть, да не разслабееши, но делай. Брань твори: егда крепится брань, крепися и ты, зовый: Господи Иисусе Христе, Ты видиши немощь мою и скорбь мою, помози ми и избави мя от гонящих мя, яко к Тебе прибегох (Пс. 141, 7). И помолися прияти силу работати Богови в сердце чистом. Знамение, яко имать кто упование на Бога, есть, еже оттрясти себе от всякаго помысла попечения плоти, и отнюд не помыслити, яко имать нечто века сего: понеже на тое имать упование, а не на Бога. Знамение прощения грехов есть, еже кому возненавидети я и ктому не творити я. Аще ли же еще поучается в них, и слагается сердце его в них, или и делает, то знамение есть, яко еще не прощени суть ему, но обвиняется в них. Еже седети по Богу, есть, еже осуждати кому себе, егда услаждается сердцем о доброте келлии, или в телесном покои своем, и глаголати: увы мне грешному, яко обретаю вещи на осуждение мне, и не достоин есмь онех: а инии достойнии утесняются, обходяще и не обретающе телеснаго покоя! Господи Иисусе Христе, прости мне и за сие имене ради Твоего, нареченнаго на нас. Господь да укрепит тя и утвердит, чадо, да предуспееши и приидеши в меру совершенну. Аминь.

Вопрос 541. Брат вопроси инаго старца Иоанна: отче, помолися о мне Господа ради. И рцы ми: добро ли есть, еже просити нам отцев многажды молитися о нас: аще уже и увериша нас, яко сие творят? И не мнимся ли некако искушати их?

Ответ Иоанна. Брате, многажды написах тебе о молитве, яко по заповеди Божией должни есмы молитися друг за друга: наипаче, егда и просими есмы от друг друга сие творити, то много паче должники обретаемся. Не можем убо не сотворити силу нашу. А о еже просити молитвы отец наших, полезно есть. Глаголет бо: «молитеся друг за друга» (Иак. 5, 16). И паки: «не требуют здравии врача, но болящии» (Лк. 5, 31). И не подобает нерадети о сем поминая безочство (настойчивость) вдовы оныя к неправедному князю. И понеже весть Отец наш Небесный, ихже требуем прежде еже просити Его, то почто не рече: не просите? Вем бо, чесо хощете, прежде неже вам просити Мя. Но Сам рече: «Просите, и примете» и прочая (Мф. 7, 7). Темже убо, добро есть еже просити, да приимем по Его обетованию. Прося же молитвы, тако рцы: авво, зле стражду: молю тя, помолися о мне, якоже веси, яко требую милости Божия. И якоже хощет, Бог сотворит с тобою милость Свою. Того бо есть человеколюбие и Того есть слава, вовеки, аминь.

Вопрос 542. Аще кто ядый купно с братиею скорее приимет потребу свою, добро ли есть просити авву, да востанет? Или да пребудет, дондеже вси востанут? Аще ли же меру хлеба соразделит на вся варения, кое есть лучшо?

Ответ. Селя кто на трапезе, аще увидит, яко бысть его потреба, и не может седети не ядый, да просит востати. А еже седети и не ясти, больше того есть. А еже распростерти частицу свою на вся варения, сие добрейше есть обою.

Вопрос 543. Братия, хотяще воздержатися, вопросиша авву, аще повелит им востати прежде брати от трапезования, за еже не мощи седящим победити чрева. И авве повелевшу им востати, нецыи соблазнишася и оклеветоваху их, не разумеюще сущую от сего пользу. И послаша вопрошающе тогожде старца о сем.

Ответ. Онии убо, яко делатели и внимающии своим душам, творят сие подвизающеся на воздержание, да не когда, внегда седети, полакомятся еще прияти от предложенных. Совершенных бо есть еже пребыти на трапезе и не победитися чревом. Вы же праздни есте, яко не вразумистеся в словеса отцев, глаголющих: да не речеши, чесо ради сие? Но себе вонми. Иже паки увещавают не оклеветати кого: исполняюще пророческое слово. «Яко да не возглаголют уста моя дел человеческих» (Пс. 16, 4). И впадосте во изречение глаголющее: «злый человек от злаго сокровища своего износит злая» (Мф. 12, 35). Почто паче не помыслисте о братиях онех благая в назидание, яко мы нерадим, а братия наши воздержатся? Якоже тии востающии братия благая помышляют о вас, глаголюще: увы нам! яко от немощи востаем, братия же наши, аще и больше нас ядят, не вредятся. Вся бо с разсуждением творят. И в сем, тии убо избегают прещения онаго глаголюща: «не судите, да не судими будете» (Мф. 7, 1). Вы же впадаете в не, осуждающе братий ваших, сущих превыше вас: преступающе слово апостола глаголющее: «ядый не ядущаго да не укоряет» (Рим. 14, 3). Паче же, должни есте сами, причащающеся больше онех, печалитися убо, яко побеждени чревом: благодарити же Богови о причастии. И может вас благодарением сим свободити от брани чрева, и осуждения, еже на братию. Аще же хощете уразумети, то в разсуждение приходят дела, еже разсудити благое от злаго, по апостолу глаголющему: «вся искушайте, доброе держите» (1 Фес. 5, 20). Разсуждение убо аввы сие дело есть, кроме всякаго противословия.

Вопрос 544. Брат вопроси великаго старца, глаголя: догматическия книги имам, и читая в них, ощущаю, яко преносится ум мой в видение тех от страстных помыслов. Иногда же запрещает мне помысл, глаголя: не должен еси чести, окаянен сый и нечист.

Ответ Варсануфия. Не бых хотел в сих, за неже тыя горе взимают ум, но во словесех старец, яко сия смиряют долу ум. Аз же не яко безчестя тыя рех, но яко советуя: есть бо пища, и пища.

545. Брат некий странный больный, прииде во общежитие врачевания иский. И дан бысть в келлию единаго брата, и тяжце понесе брат той, и уразумев старец, сказа ему сия.

Испытай помысл твой, о брате! И уразумей, аще бы был брат твой по плоти, не восхотел ли бы еси прияти его на вежде свои? Виждь убо, како плотская делаются с тобою. Приял бо еси духовнаго твоего брата: вси бо едино есмы о Христе. Внемли убо себе, брате, во страсе Божии.

Сия слышав брат, умилися зело, и пользу прием, явил есть старцеви глаголя: прости мя, господине авво, и помолися о мне. И приемлю брата моего с великою радостию.

Вопрос 546. Брат быв тогожде старца Варсануфия, прежде неже безмолвствовати ему во общежитии аввы Серида, устранися. И возвращся уничижаше некоего брата благоговейна, аки невежду суща и ничтожна. Пребысть же просяй старца наставити его в первое, рекл: Бог приведе мя до твоей святыни.

Ответ. Глаголет апостол: «Царство Божие не в словеси» (1 Кор. 4, 20). Рече авва Макарий: право верующаго и во благочестии трудящагося, Иисус не предает во страсти в руки бесов. Господь рече, яко многи вдовицы беша во дни Илиины во Исраили, и ни ко единой их послан бысть Илиа, токмо в Сарепту Сидонскую (к жене вдовице), аще и еллинска бяше. И паки рече: мнози прокаженни бяху во дни Елиссеевы во Исраили: и ни един же от них очистися, токмо Нееман Сирианин; аще бо и иноплеменник бяше, но верова. Темже непщевах, яко устранився, оставил еси оправдание и стяжал еси смирение. И яко же вижду от помыслов твоих, яко оный самый еси или и горший. Аще «буяя и уничиженная, и ничтожная мира избра Бог» (1 Кор. 1, 27, 28), то яве есть, яко славная, и имущая похвалу у человек отверже. Не убо угодная человеком, угодна, суть и Богови: но безчестная у человек Бога ради, имут блаженство пред Богом. Якоже глаголет, яко «блажени будете, егда разлучат вы человецы и возненавидят, и пронесут имя ваше яко зло, имене Моего ради: радуйтеся и взыграйте, яко тако творяху пророком отцы их» (Лк. 6, 22, 23). Воспитан был еси купно с нами время не мало: испытай сердце свое, кую вину, кий совет имей еси от нас отсецающий тя от пути Божия? И покров бывший на тебе, откуду тебе бысть? Точию от скорби, юже претерпел еси, яко изгна тя старец на пользу твою. Рцы ми, брате, начало человека Бог ищет, или последних яже сбудутся с ним? Ты убо веси, что притяжал еси во время странствия твоего. Паки веси, яко живущу ти купно со мною тогда, рех: яко аще слушаеши мя в едином, и противоглаголеши мне во едином, то и в немже слушаеши, воля твоя есть в том и не имам осуждения дати за тебе ответ. Аще Бог приведе тя, то Он и управит тя; аще ли же волею своею, то писано есть: «Отпустих я по начинанием сердец их» (Пс. 80, 13). Темже убо помолися о мне и буди без попечения от нас. И аз хощу во всех без попечения быти о Господе.

Вопрос 547. Братия изшедше от общежития некоего купиша себе келлии в пределх, в нихже бе общежитие сие, без совета аввы своего. И прискорбен быв на них авва Серид, яко на преступльших чин, хотяше изгнати их оттуду: они же противоречити начаша. И вопрошен бысть тойжде старец о сем, добре ли сотвориша братия тии и что подобает сотворити?

Ответ. Всюду обретаем, яко прекословие многи человеки погубило есть. Якоже и Дафана и Авирона сопротивльшияся Моисеови: и сие знамение есть зло. Яко, аще аввы своего не устрашишася, то кого имут усрамитися? А еже не срамлятися кому, знамение есть бунтования помысла, а сие бунтование наущения есть диаволя. Из начала бо возбунтовася диавол. И творящии тожде, чада его бывают. И кая вина бывает сим? Таковии изгнанием изгнаша себе от смирения, затыкающе уши своя не услышати глаголюща: «аще гонят вы во граде сем, бегайте в другий» (Мф. 10, 23). И «хотящему судитися с тобою, и ризу твою взяти, отпусти ему и срачицу» (Мф. 5, 40). Они же злу повинушася. А злое ничтоже благо раждает. Глаголет бо: «не может древо зло плоды добры творити» (Мф. 7, 18). Попраша же чин святых отцев, в преступлении своем, отцы бо глаголют: яко, аще отыдеши поселитися на некоем месте, то первее вопроси, да не когда оскорбится кто в поселении твоем. И аще о инех заповедуют тако отцы, кольми паче идеже есть скорбь игумену таковаго человека? Конец же вещи сея, тако должен есть быти: да тии убо, аки согрешшии, поймут и ины, и да просят авву своего простити им и не воздати зла за зло: а сей, да простит им. Писано бо есть: «яко, должни есмы мы силнии немощи немощных носити» (Рим. 15, 1). И Господь глаголет: «аще не отпущаете человеком согрешения их, ни Отец ваш Небесный отпустит вам согрешений ваших» (Мф. 6, 15). И паки: «будите совершени, якоже Отец ваш

Небесный совершен есть» (Мф. 5, 48). И тако прославится Бог, от еже быти ему в назидание многих.

Вопрос 548. Авва сего общежития, в немже быша и ины святии старцы, завеща некоей вещи быти. А нецыи из братий, имуще волю, тяжце понесоша и роптаху. И сие уразумев тойжде великий старец сказа им ответ сей: братие, рече Господь: «Овцы Моя гласа Моего слушают, и по Мне грядут» (Ин. 10, 27) и прочая. Аще кто убо истинен ученик есть, то во всех послушен пребывает авве своему до смерти. И во всех, яже творит авва его, созидается, и не смеет разсудити глаголемая; ниже рещи: почто сие? И на что сие? Понеже не будет ученик аввы своего, но судия. Сия же вся не бывают, разве точию от злейшия воли человечи. Аще убо авва некоего, речет быти вещи некоей, воспрекословит же ученик: то явно есть, яко слово свое хощет поставити и упразднити слово аввы своего. Разсуждает убо таковый, кто есть авва, той ли, егоже упразднися слово, или егоже слово бысть? Аще убо хощет кто волю свою сотворити, то сын есть диаволь. И аще кто творит волю таковаго, то волю диаволю творит. Аще ли же и сотворит сей волю свою, то ни тако приимет покой. И что суть яже посреде? Точию непослушание: еже есть погибель души. Аще убо кто видит себе о авве своем соблазняющася, то должен есть отыти от него, и не погубити душу свою, и понести осуждение за инех, ихже развращает: не ведая, добре ли, или зле сотворил есть авва, но соблазняяся безвременно за волю свою, зане аще и сотворися воля его, праведнее аввы своего никтоже бе. Аще ли же добрее аввы своего весть полезное, то почто еще и ученичествует у него? Да отыдет и сам и да научит инех. Не прельщайтеся от диавола, и не пребудете имуще волю вашу, на вред ваш. Никогдаже бо бывает воля ваша. Злоба бо злобу не отъемлет. Но егда оставите волю вашу Богови, то Той сотворит, якоже хощет. Аз, братие, якоже весть Бог, щадя вас написах вам. Аще убо кто приемлет, будет тому во спасение. И аще кто не приемлет, аще восхощет и плюнути на написанная, в том есть. Якоже уже нецыи в сердце своем, ницыи же и усты клеветаша на ны. Простите ми.

Ответ 549, тогожде великаго старца к некоему от отцев, вопросившу, подобает ли крепкою епитимиею наказати ученика своего прекословящаго?

Брате возлюбленне! Разумей время сие, яко лукаво есть. Понеже добро и чудно есть наказание, и многа имать свидетельства. Глаголет бо: «Егоже любит Господь, наказует» (Евр. 12, 6). И паки: «Блажен человек егоже аще накажеши Господи» (Пс. 93, 12) и прочая. Брат сей от жестосердия ратуем есть. Но претерпи, и спотрудися с ним. И «обличи, запрети, умоли», по апостолову слову (Тим. 3, 2), и аще приимет сие наказание, то паки приобретен будет. Возбуди его от тяжчайшаго сна жестосердия. Аще бо одебелеет кожа терния его, то плач о нем велий и нестерпимый. Аще ли же потрудится восторгнути терния, дондеже суть былия, то может вскоре избавитися таковыя страсти. Аще ли же ожесточится тернийце оно, то трудом и подвигом с болезнми восторгнутися имать. Рцы убо ему внимати себе тщательно.