Учебник латинского языка для высших духовных учебных заведений

Rex caelestis, Paraclete, Spiritus veri, Qui ubique ades et omnia imples, Thesaure bonorum et vitae Dator, veni inhabitaque in nos et purga nos omni obscenitate, et salva, Bone, animas nostras.

Trisagion

Sancte Deus, Sancte Fortis, Sancte Immortalis, miserere nostri (ter).

Gloria Patri, et Filio, et Spiritui Sancto, sicut erat in principio, et nunc, et semper, et in saecula saeculorum. Amen.

*Omnisancte Trinitas, miserere nostri; Domine, munda peccata nostra; Despota, ignosce nefaria nostra (iniquitates nostras); Sancte, visita nos et cura infirmitates nostras.

Domine, miserere (ter).

Gloria, et nunc:

Pater noster

Pater noster, Qui es in caelis, sanctificetur nomen Tuum, adveniat Regnum Tuum, fiat voluntas Tua, sicut in caelo et in terra. Panem nostrum cotidianum da nobis hodie et dimitte nobis debita nostra, sicut et nos dimittimus debitoribus nostris. Et ne nos inducas in temptationem, sed libera nos a malo. Amen.

Credo

¹Credo in Unum Deum, Patrem Omnipotentem, Factorem caeli et terrae, visibilium omnium et invisibilium.

²Et in Unum Dominum Iesum Christum, Filium Dei Unigenitum. Et ex Patre natum ante omnia saecula. Deum de Deo, Lumen de Lumine, Deum verum de Deo vero. Genitum, non factum, consubstantialem Patri, per Quem omnia facta sunt.

³Qui propter nos, homines, et propter nostram salutem descendit de caelis. Et incarnatus est de Spiritu Sancto ex Maria Virgine et Homo factus est.

⁴Crucifixus etiam pro nobis sub Pontio Pilato, passus et sepultus est.

⁵Et resurrexit tertia die secundum Scripturas.

⁶Et ascendit in caelum, sedet ad dexteram Patris.

⁷Et iterum venturus est cum gloria iudicare vivos et mortuos, Eiusque Regni non erit finis.

⁸Et in Spiritum Sanctum, Dominum vivificantem, Qui ex Patre procedit; Qui cum Patre, et Filio simul adoratur et conglorificatur, Qui locutus est per prophetas.

⁹Et in Unam Sanctam Catholicam et Apostolicam Ecclesiam.

¹⁰Confiteor unum baptisma in remissionem peccatorum.

¹¹Et exspecto resurrectionem mortuorum.

¹²Et vitam venturi saeculi. Amen.

Euangelium paschale

In principio erat Verbum, et Verbum erat apud Deum, et Deus erat Verbum. Hoc erat in principio apud Deum. Omnia per Ipsum facta sunt, et sine Ipso factum est nihil, quod factum est. In Ipso vita erat, et vita erat lux hominum. Et lux in tenebris lucet, et tenebrae eam non conprehenderunt. Fuit homo missus a Deo, cui nomen erat Iohannes. Hic venit in testimonium, ut testimonium perhiberet de lumine, ut omnes crederent per illum. Non erat ille lux, sed ut testimonium perhiberet de lumine. Erat lux vera, quae inluminat omnem hominem venientem in mundum. In mundo erat, et mundus per Ipsum factus est, et mundus Eum non cognovit. In propria venit et sui Eum non receperunt. Quotquot autem receperunt Eum, dedit eis potestatem filios Dei fieri, his, qui credunt in nomine Eius. Qui non ex sanguinibus, neque ex voluntate carnis, neque ex voluntate viri, sed ex Deo nati sunt. Et Verbum caro factum est et habitavit in nobis, et vidimus gloriam Eius, gloriam quasi unigeniti a Patre, plenum gratiae et veritatis. Iohannes testimonium perhibet de Ipso et clamat dicens: “Hic erat quem dixi vobis, Qui post me venturus est, ante me factus est, quia prior me erat. Et de plenitudine Eius nos omnes accepimus et gratiam pro gratia. Quia lex per Mosen data est, gratia et veritas per Iesum Christum facta est (Ioh. 1, 1-17).

Praecepta beatitudinis

Beati pauperes spiritu, quoniam ipsorum est Regnum caelorum.

Beati mites, quoniam ipsi possidebunt terram.

Beati, qui lugent, quoniam ipsi consolabuntur.

Beati, qui esuriunt et sitiunt iustitiam, quoniam ipsi saturabuntur.

Beati misericordes, quia ipsi misericordiam consequentur.

Beati mundo corde, quoniam ipsi Deum videbunt.

Beati pacifici, quoniam filii Dei vocabuntur.

Beati, qui persecutionem patiuntur propter iustitiam, quoniam ipsorum est Regnum caelorum.

Beati estis, cum maledixerint vobis et persecuti vos fuerint et dixerint omne malum adversum vos mentientes propter Me.

Gaudete et exultate, quoniam merces vestra copiosa est in caelis (Mat. 5, 3-12).

Decalogus

Ego sum Dominus Deus tuus, non habebis deos alienos coram Me.

Non facies tibi sculptile, neque omnem similitudinem, quae est in caelo desuper, et quae in terra deorsum, nec eorum, quae sunt in aquis sub terra; non adorabis ea, neque coles.

Non assumes nomen Domini tui in vanum.

Memento, ut diem sabbati sanctifices. Sex diebus operaberis, et facies omnia opera tua, septimo autem die sabbatum Domini Dei tui est.

Honora patrem tuum et matrem tuam, ut bene tibi sit et ut sis longaevus super terram.

Non occides.

Non moechaberis.

Non furtum facies.

Non loqueris contra proximum tuum falsum testimonium.

Non concupisces uxorem proximi tui, nec desiderabis domum eius, non agrum, non servum, non ancillam, non bovem, non asinum, nec omnia, quae illius sunt.

PSALMI

Psalmus primus

¹Beatus vir, qui non abiit in consilio impiorum, et in via peccatorum non stetit, et in cathedra pestilentiae non sedit; ²sed in lege Domini voluntas eius, et in lege eius meditabitur die ac nocte! ³Et erit tamquam lignum, quod plantatum est secus decursus aquarum, quod fructum suum dabit in tempore suo, et folium eius non defluet; et omnia, quaecumque faciet, prosperabuntur. ⁴Non sic impii, non sic; sed tamquam pulvis, quem proicit ventus a facie terrae. ⁵Ideo non resurgent impii in iudicio, neque peccatores in consilio iustorum. ⁶Quoniam novit Dominus viam iustorum, et iter impiorum peribit.

Psalmus tertius et tricesimus

¹ David cum inmutavit vultum suum coram Abimelech, et d i misit eum, et abiit.

²Benedicam Dominum in omni tempore; semper laus Eius in ore meo. ³In Domino laudabitur anima mea; audiant mansueti et laetentur. ⁴Magnificate Dominum mecum, et exaltemus nomen Eius in id ipsum. ⁵Exquisivi Dominum, et exaudivit me, et ex omnibus tribulationibus meis eripuit me. ⁶Accedite ad eum et inluminamini, et facies vestrae non confundentur. ⁷Iste pauper clamavit, et Dominus exaudivit eum et de omnibus tribulationibus eius salvavit eum. ⁸Vallabit angelus Domini in circuitu timentium Eum et eripiet eos. ⁹Gustate et videte, quoniam suavis est Dominus! Beatus vir, qui sperat in Eo! ¹⁰Timete Dominum, omnes sancti Eius, quoniam non est inopia timentibus Eum. ¹¹Divites eguerunt et esurierunt, inquirentes autem Dominum non minuentur omni bono.

Diapsalma

¹²Venite, filii, audite me: timorem Domini docebo vos. ¹³Quis est homo, qui vult vitam, cupit videre dies bonos? ¹⁴Prohibe linguam tuam a malo et labia tua, ne loquantur dolum. ¹⁵Deverte a malo et fac bonum; inquire pacem et persequere eam. ¹⁶Oculi Domini super iustos, et aures Eius in precem eorum. ¹⁷Facies Domini super facientes mala, ut perdat de terra memoriam eorum. ¹⁸Clamaverunt iusti, et Dominus exaudivit et ex omnibus tribulationibus eorum liberavit eos. ¹⁹Iuxta est Dominus his, qui tribulato sunt corde, et humiles spiritu salvabit. ²⁰Multae tribulationes iustorum, et de omnibus his liberavit eos. ²¹Dominus custodit omnia ossa eorum; unum ex his non conteretur. ²²Mors peccatorum pessima et qui oderunt iustum delinquent. ²³Redimet Dominus animas servorum suorum, et non delinquent omnes, qui sperant in Eum.