Учебник латинского языка для высших духовных учебных заведений

Psalmus quinquagesimus

¹ In finem psalmus David, ² cum venit ad eum Nathan propheta, quando intravit ad Bet h sabee.

³Miserere mei, Deus, secundum magnam misericordiam Tuam et secundum multitudinem miserationum Tuarum dele iniquitatem meam. ⁴Amplius lava me ab iniquitate mea et a peccato meo munda me. ⁵Quoniam iniquitatem meam ego cognosco, et peccatum meum contra me est semper. ⁶Tibi soli peccavi et malum coram Te feci, ut iustificeris in sermonibus Tuis et vincas, cum iudicaris. ⁷Ecce enim in iniquitatibus conceptus sum, et in peccatis concepit me mater mea. ⁸Ecce enim veritatem dilexisti, incerta et occulta sapientiae Tuae manifestasti mihi. ⁹Asparges me hysopo, et mundabor; lavabis me, et super nivem dealbabor. ¹⁰Auditui meo dabis gaudium et laetitiam, exultabunt ossa humiliata. ¹¹Averte faciem Tuam a peccatis meis et omnes iniquitates meas dele. ¹²Cor mundum crea in me, Deus, et spiritum rectum innova in visceribus meis. ¹³Ne proicias me a facie Tua et Spiritum Sanctum Tuum ne auferas a me. ¹⁴Redde mihi laetitiam salutaris Tui et Spiritu principali confirma me. ¹⁵Docebo iniquos vias Tuas, et impii ad Te convertentur. ¹⁶Libera me de sanguinibus, Deus, Deus, salutis meae, exultabit lingua mea iustitiam Tuam. ¹⁷Domine, labia mea aperies, et os meum adnuntiabit laudem Tuam. ¹⁸Quoniam si voluisses sacrificium, dedissem utique; holocaustis non delectaberis. ¹⁹Sacrificium Deo spiritus contribulatus; cor contritum et humiliatum Deus non spernet. ²⁰Benigne fac, Domine, in bona voluntate Tua Sion et aedificentur muri Hierusalem. ²¹Tunc acceptabis sacrificium iustitiae, oblationes et holocausta; tunc inponent super altare Tuum vitulos.

Psalmus nonagesimus

¹ Laus cantici David

Qui habitat in adiutorio Altissimi, in protectione Dei caeli commorabitur. ²Dicet Domino: “Susceptor meus es Tu et refugium meum, Deus meus, sperabo in Eum!” ³Quoniam Ipse liberabit me de laqueo venantium et a verbo aspero; ⁴in scapulis Suis obumbrabit te et sub pinnis Eius sperabis; scuto circumdabit te veritas Eius. ⁵Non timebis a timore nocturno, a sagitta volante in die, ⁶a negotio perambulante in tenebris, ab incursu et daemonio meridiano. ⁷Cadent a latere Tuo mille et decem milia a dextris Tuis, ad Te autem non adpropinquabit. ⁸Verumtamen oculis Tuis considerabis et retributionem peccatorum videbis. ⁹“Quoniam Tu, Domine, spes mea”; Altissimum posuisti refugium tuum. ¹⁰Non accedent ad te mala, et flagellum non adpropinquabit tabernaculo tuo. ¹¹Quoniam angelis Suis mandabit de te, ut custodiant te in omnibus viis tuis. ¹²In manibus portabunt te, ne forte offendas ad lapidem pedem tuum. ¹³Super aspidem et basiliscum ambulabis et conculcabis leonem et draconem. ¹⁴“Quoniam in Me speravit et liberabo eum; protegam eum, quia cognovit nomen Meum. ¹⁵Clamabit ad Me, et exaudiam eum; cum ipso sum in tribulatione; eripiam eum et clarificabo eum; ¹⁶longitudine dierum replebo eum et ostendam illi salutare Meum”.

Sanctus

Sanctus, sanctus, sanctus Dominus Deus Sabaoth. Pleni sunt caeli et terra gloria Tua. Hosanna in excelsis, benedictus, Qui venit in nomine Domini. Hosanna in excelsis.

Sanctus, sanctus, sanctus Dominus exercituum, plena est omnis terra gloria Dei.

Dirigatur, Domine, oratio mea.

Inclina cor meum, Deus, in testimonia Tua. Ego dixi: Domine, miserere mei. Sana animam meam, quia peccavi Tibi.

Domine, exaudi orationem meam, et clamor meus ad Te veniat.

Gratiam Tuam quaesumus, Domine, mentibus nostris infunde: ut qui, Angelo nuntiante, Christi Filii Tui incarnationem cognovimus; per passionem Eius et crucem, ad resurrectionis gloriam perducamur. Per Eumdem Christum Dominum nostrum. Amen.

Divinum auxilium maneat semper nobiscum.

Domine labia mea aperies et os meum adnuntiabit laudem Tuam. Deus, in adiutorium meum intende. Domine, ad adiuvandum me festina.

Mundi Redemptor, quaesumus Tu probra nostra diluas, nobisque largus commoda vitae perennis conferas. Praesta, Pater piissime, Patrique compar Unice, cum Spiritu Paracleto regnans per omne saeculum. Amen.

Dominus regnavit, decore indutus est. Indutus est Dominus fortitudine et praecinxit Se virtute.

Benedicat et custodiat nos omnipotens et misericors Dominus, Pater, et Filius, et Spiritus Sanctus. Amen.

In manus Tuas, Domine, commendo spiritum meum.

Nunc dimittis

Nunc dimittis servum Tuum, Domine, secundum verbum Tuum in pace, quia viderunt oculi mei salutare Tuum, quod parasti ante faciem omnium populorum, lumen ad revelationem gentium et gloriam plebis Tuae Israhel.

Christus resurrexit

Christus resurrexit e mortuis, morte mortem calcavit et entibus in sepulchris vitam donavit.

Gloria (Glorificatio Grandis)

Gloria in excelsis Deo, et in terra pax, hominibus benevolentia.

Laudamus Te, benedicimus Te, adoramus Te, glorificamus Te, gratias agimus Tibi propter magnam gloriam Tuam, Domine Deus, Rex caelestis, Deus Pater Omnipotens, Domine Fili Unigenite Iesu Christe, et Sancte Spiritus.

Domine Deus, Agne Dei, Fili Patris, Qui tollis peccata mundi, miserere nostri; Qui tollis peccata mundi, suscipe deprecationem nostram; Qui sedes ad dextram Patris, miserere nostri, quoniam Tu solus Sanctus, Tu solus Dominus, Iesus Christus in gloria Dei Patris. Amen.

Hymnus sancti Ambrosii (340-397)

Te Deum laudamus, Te Dominum confitemur;

Te aeternum Patrem omnis terra veneratur;

Tibi omnes angeli, Tibi caeli et universae potestates,

Tibi Cherubim et Seraphim incessabili voce proclamant:

Sanctus, sanctus, sanctus Dominus Deus Sabaoth,

Pleni sunt caeli et terra maiestatis gloriae Tuae.

Te gloriosus apostolorum chorus,

Te prophetarum laudabilis numerus,

Te martyrum candidatus laudat exercitus,

Te per orbem ferrarum sancta confitetur Ecclesia:

Patrem immensae maiestatis,

Venerandum Tuum verum et unicum Filium,

Sanctum quoque Paracletum Spiritum.

Tu, Rex gloriae Christe,

Tu Patris sempiternus es Filius,

Tu ad liberandum suscepturus hominem non horruisti Virginis uterum,

Tu, devicto mortis aculeo, aperuisti credentibus regna caelorum,

Tu ad dextram Dei sedes in gloria Patris,

Iudex crederis esse venturus.

Te ergo quaesumus, Tuis famulis subveni, quos pretioso sanguine redemisti,

Aeterna fac cum sanctis in gloria numerari,

Salvum fac populum Tuum, Domine, et benedic hereditati Tuae,

Et rege eos, et extolle illos usque in aeternum.

Per singulos dies benedicimus Te

Et laudamus nomen Tuum in saeculum et in saeculum saeculi.

Dignare, Domine, die isto sine peccato nos custodire.

Miserere nostri, Domine, miserere nostri.

Fiat misericordia Tua, Domine, super nos, quemadmodum speravimus in Te.

In Te, Domine, speravi — non confundar in aeternum. Amen.

ORATIONES ALIAE

Ave, Maria

Ave, Maria, gratia plena, Dominus Tecum. Benedicta Tu in mulieribus et benedictus fructus ventris Tui Iesus. Sancta Maria, Mater Dei, ora pro nobis peccatoribus nunc et in hora mortis nostrae. Amen.

Ave, Regina caelorum. Ave, Domina angelorum. Salve, Radix, salve, Porta, ex qua mundo lux est orta. Gaude, Virgo gloriosa, super omnes speciosa; vale, o valde decora, et pro nobis exora. Dignare me laudare Te, Virgo sacrata. Da mihi virtutem contra hostes Tuos. Regina coeli, laetare, alleluia. Gaude et laetare, Virgo Maria, alleluia.

Salve, Regina, Mater misericordiae, vita, dulcedo, et spes nostra, salve. Ad Te clamamus, exsules filii Hevae, ad Te suspiramus gementes et flentes in hac lacrymarum valle. Eia ergo, Advocata nostra, illos Tuos misericordes oculos ad nos converte. Et Iesum, benedictum fructum ventris Tui, nobis post hoc exsilium ostende. O clemens, o pia, o dulcis Virgo Maria. Ora pro nobis, sancta Dei Genitrix, ut digni efficiamur promissionibus Christi.

Deipara Virgo

Deipara Virgo, ave, gratia plena Maria, Dominus Tecum! Benedicta Tu in mulieribus, et benedictus fructus ventris Tui, quia Salvatorem peperisti animarum nostrarum.