Библия (на цсл. гражданским шрифтом)

23 И виде моисей вся дела, и бяху сотворена та, якоже заповеда Господь моисею, тако сотвориша я, и благослови их моисей.

Глава 40

1 И рече Господь к моисею, глаголя:

2 в день первый месяца перваго, в новомесячие поставиши скинию свидения:

3 и да положиши кивот свидения, и покрыеши кивот завесою:

4 и внесеши трапезу, и предложиши предложение ея: и внесеши светилник, и поставиши светила его:

5 и положиши олтарь златый, в каждение пред кивотом свидения, и возложиши покров завесы над дверию скинии свидения:

6 и олтарь приношений поставиши у дверий скинии свидения,

7 и поставиши умывалницу между скиниею свидения и между олтарем, и влиеши в ню воду:

8 и поставиши двор окрест и даси завесу дверий двора:

9 и возмеши елей помазания и помажеши скинию и вся яже в ней, и освятиши ю и вся сосуды ея, и будут свята:

10 и да помажеши олтарь приношений и вся сосуды его, и освятиши олтарь, и будет олтарь святый святых:

11 и помажеши умывалницу и стояло ея и освятиши ю:

12 и да приведеши аарона и сынов его пред двери скинии свидения и измыеши их водою:

13 и да облечеши аарона в ризы святыя и помажеши его, и освятиши его, и да жрет мне:

14 и сыны его да приведеши и облечеши я в ризы,

15 и да помажеши я, якоже помазал еси отца их, да жрут мне: и будет, еже быти им помазанию жречества во век, в роды их.

16 И сотвори моисей вся, елика заповеда ему Господь, сице сотвори.

17 И бысть в первый месяц во второе лето исходящым им от египта, в новомесячии ста скиния.

18 И постави моисей скинию, и подложи стояла ея, и возложи главицы, и вложи разворы, и постави столпы,

19 и простре опоны на скинию, и возложи покрывало скинии на ню с верху, якоже заповеда Господь моисею:

20 и взем свидения, вложи в кивот, и подстави ноги под кивотом, и возложи очистилище над кивотом:

21 и внесе кивот в скинию, и возложи покров завесы, и закры кивот свидения, якоже заповеда Господь моисею:

22 и постави трапезу в скинии свидения, на страну скинии свидения, яже к северу, внеуду завесы скинии:

23 и возложи на ню хлебы предложения пред Господем, якоже заповеда Господь моисею:

24 и постави светилник в скинии свидения прямо трапезы, на страну скинии, яже к югу:

25 и постави свещники его пред Господем, якоже заповеда Господь моисею:

26 и постави олтарь златый в скинии свидения противу завесы,

27 и покади над ним фимиамом сложения, якоже заповеда Господь моисею:

28 и положи завесу дверий скинии,

29 и олтарь приношений постави у дверий скинии покрова свидения, и вознесе на нем всесожжение и жертву, якоже заповеда Господь моисею:

30 и сотвори умывалницу между скиниею свидения и между жертвенником,

31 и влия в ню воду, да умывают от нея моисей и аарон и сынове его руки своя и ноги, входящым им в скинию свидения:

32 или приходяще к жертвеннику служити, умывахуся от нея, якоже заповеда Господь моисею:

33 и постави двор окрест скинии и олтаря и положи завесу двора. И сконча моисей вся дела.

34 И покры облак скинию свидения, и славы Господни исполнися скиния,

35 и не можаше моисей внити в скинию свидения, яко осеняше над нею облак, и славы Господни исполнися скиния:

36 егда же восхождаше облак от скинии, воздвизахуся сынове израилевы со имением своим:

37 аще же не взыде облак, не воздвизахуся даже до дне, в оньже взыдет облак:

38 облак бо Господнь бяше над скиниею в день, и огнь бяше над нею в нощь пред всем израилем во всех путешествиих их.

Третья книга Моисеева. Левит

Глава 1

1 И воззва Господь моисеа, и рече ему из скинии свидения, глаголя:

2 глаголи сыном израилевым, и речеши к ним: человек от вас аще принесет дары Господу, от скотов и от говяд и от овец да принесете дары вашя:

3 аще всесожжение дар его, от говяд мужеск пол непорочен принесет, пред двери скинии свидения да принесет е приятно пред Господем,

4 и да возложит руку на главу приношения, приятно ему, умилостивити о нем:

5 и да заколют телца пред Господем: и да принесут сынове аароновы жерцы кровь, и да пролиют кровь на олтарь окрест, иже у дверий скинии свидения,

6 и одравше всесожжение, да раздробят е на уды,

7 и да возложат сынове аарони жерцы огнь на олтарь, и да вскладут дрова на огнь:

8 и да вскладут сынове аарони жерцы раздробленая, и главу, и тук на дрова сущая на огни яже на олтари,

9 утробу же и ноги да измыют водою: и да возложит жрец вся на олтарь: приношение есть жертва, воня благоухания Господу.

10 Аще же от овец дар свой Господви (принесет) от агнец и от козлищ во всесожжение, мужеск пол непорочен да принесет и,

11 и да возложит руку на главу его, и да заколют е в стране олтаря к северу пред Господем: и да пролиют сынове аарони жерцы кровь его на олтарь окрест:

12 и да раздробят его на уды, и главу, и тук его, и да вскладут я жерцы на дрова сущая на огни яже на олтари,

13 и утробу и ноги измыют водою: и принесет жрец вся, и да возложит на олтарь: приношение есть жертва, воня благоухания Господу.

14 Аще же от птиц приношение принесет дар свой Господу, и принесет от горлиц или от голубов дар свой,

15 и да принесет и жрец ко олтарю, и да отторгнет главу его, и да возложит жрец на олтарь и исцедит кровь у стояла олтаря:

16 и да отлучит гортань с перием, и извергнет ю от олтаря на восток на место пепела:

17 и да изломит его от крил, и да не разделит: и да возложит е жрец на олтарь на дрова, яже на огни: приношение есть жертва, воня благоухания Господу:

Глава 2

1 Аще же душа принесет дар жертву Господу, мука пшенична да будет дар его, и да возлиет на ню елей, и возложит на ню ливан: жертва есть: