Новый Завет (на цсл., гражданским шрифтом)

Глава 9

1 И влез в корабль, прейде и прииде во свой град.

2 И се, принесоша ему разслаблена (жилами), на одре лежаща: и видев Иисус веру их, рече разслабленному: дерзай, чадо, отпущаются ти греси твои.

3 И се, нецыи от книжник реша в себе: сей хулит.

4 И видев Иисус помышления их, рече: вскую вы мыслите лукавая в сердцах своих?

5 что бо есть удобее рещи: отпущаются ти греси: или рещи: востани и ходи?

6 но да увесте, яко власть имать Сын Человеческий на земли отпущати грехи: тогда глагола разслабленному: востани, возми твой одр и иди в дом твой.

7 И востав, (взем одр свой,) иде в дом свой.

8 Видевше же народи чудишася и прославиша Бога, давшаго власть таковую человеком.

9 И преходя Иисус оттуду, виде человека седяща на мытнице, матфеа глаголема: и глагола ему: по мне гряди. И востав по нем иде.

10 И бысть ему возлежащу в дому, и се, мнози мытари и грешницы пришедше возлежаху со Иисусом и со ученики его.

11 И видевше фарисее, глаголаху учеником его: почто с мытари и грешники учитель ваш яст и пиет?

12 Иисус же слышав рече им: не требуют здравии врача, но болящии:

13 шедше же научитеся, что есть: милости хощу, а не жертвы? не приидох бо призвати праведники, но грешники на покаяние.

14 Тогда приступиша к нему ученицы иоанновы, глаголюще: почто мы и фарисее постимся много, ученицы же твои не постятся?

15 И рече им Иисус: еда могут сынове брачнии плакати, елико время с ними есть жених? Приидут же дние, егда отимется от них жених, и тогда постятся.

16 Никтоже бо приставляет приставления плата небелена ризе ветсе: возмет бо кончину свою от ризы, и горша дира будет.

17 Ниже вливают вина нова в мехи ветхи: аще ли же ни, то просадятся меси, и вино пролиется, и меси погибнут: но вливают вино ново в мехи новы, и обое соблюдется.

18 Сия ему глаголющу к ним, се, князь некий пришед кланяшеся ему, глаголя, яко дщи моя ныне умре: но пришед возложи на ню руку твою, и оживет.

19 И востав Иисус по нем иде, и ученицы его.

20 И се, жена кровоточива дванадесяте лет, приступльши созади, прикоснуся воскрилию ризы его,

21 глаголаше бо в себе: аще токмо прикоснуся ризе его, спасена буду.

22 Иисус же обращься и видев ю, рече: дерзай, дщи, вера твоя спасе тя. И спасена бысть жена от часа того.

23 И пришед Иисус в дом княжь, и видев сопцы и народ молвящь,

24 глагола им: отидите, не умре бо девица, но спит. И ругахуся ему.

25 Егда же изгнан бысть народ, вшед ят ю за руку: и воста девица.

26 И изыде весть сия по всей земли той.

27 И преходящу оттуду Иисусови, по нем идоста два слепца, зовуща и глаголюща: помилуй ны, (Иисусе) Сыне давидов.

28 Пришедшу же ему в дом, приступиста к нему слепца, и глагола има Иисус: веруета ли, яко могу сие сотворити? Глаголаста ему: ей, Господи.

29 Тогда прикоснуся очию их, глаголя: по вере ваю буди вама.

30 И отверзостася очи има: и запрети има Иисус, глаголя: блюдита, да никтоже увесть.

31 Она же изшедша прослависта его по всей земли той.

32 Тема же исходящема, се, приведоша к нему человека нема беснуема.

33 И изгнану бесу, проглагола немый. И дивишася народи, глаголюще, яко николиже явися тако во израили.

34 Фарисее же глаголаху: о князи бесовстем изгонит бесы.

35 И прохождаше Иисус грады вся и веси, учя на сонмищих их, и проповедая Евангелие Царствия, и целя всяк недуг и всяку язю в людех.

36 Видев же народы, милосердова о них, яко бяху смятени и отвержени, яко овцы не имущыя пастыря.

37 Тогда глагола учеником своим: жатва убо многа, делателей же мало:

38 молитеся убо Господину жатвы, яко да изведет делатели на жатву свою.

Глава 10

1 И призва обанадесять ученики своя, даде им власть на дусех нечистых, яко да изгонят их, и целити всяк недуг и всяку болезнь.

2 Дванадесятих же апостолов имена суть сия: первый симон, иже нарицается петр, и андрей брат его: иаков зеведеев и иоанн брат его:

3 филипп и варфоломей: фома и матфей мытарь: иаков алфеев и леввей, нареченный фаддей:

4 симон кананит и иуда искариотский, иже и предаде его.

5 Сия обанадесять посла Иисус, заповеда им, глаголя: на путь язык не идите и во град самарянский не внидите:

6 идите же паче ко овцам погибшым дому израилева:

7 ходяще же проповедуйте, глаголюще, яко приближися Царствие небесное:

8 болящыя изцеляйте, прокаженныя очищайте, мертвыя воскрешайте, бесы изгоняйте: туне приясте, туне дадите.

9 Не стяжите злата, ни сребра, ни меди при поясех ваших,

10 ни пиры в путь, ни двою ризу, ни сапог, ни жезла: достоин бо есть делатель мзды своея.

11 В оньже аще (колиждо) град или весь внидете, испытайте, кто в нем достоин есть, и ту пребудите, дондеже изыдете:

12 входяще же в дом целуйте его, глаголюще: мир дому сему:

13 и аще убо будет дом достоин, приидет мир ваш нань: аще ли же не будет достоин, мир ваш к вам возвратится.

14 И иже аще не приимет вас, ниже послушает словес ваших, исходяще из дому или из града того, оттрясите прах ног ваших:

15 аминь глаголю вам: отраднее будет земли содомстей и гоморрстей в день судный, неже граду тому.

16 Се, аз посылаю вас яко овцы посреде волков: будите убо мудри яко змия, и цели яко голубие.

17 Внемлите же от человек: предадят бо вы на сонмы, и на соборищих их биют вас,

18 и пред владыки же и цари ведени будете мене ради, во свидетелство им и языком.

19 Егда же предают вы, не пецытеся, како или что возглаголете: дастбося вам в той час, что возглаголете:

20 не вы бо будете глаголющии, но Дух Отца вашего глаголяй в вас.

21 Предаст же брат брата на смерть, и отец чадо: и востанут чада на родители и убиют их:

22 и будете ненавидими всеми имене моего ради: претерпевый же до конца, той спасен будет.

23 Егда же гонят вы во граде сем, бегайте в другий. Аминь бо глаголю вам: не имате скончати грады израилевы, дондеже приидет Сын Человеческий.

24 Несть ученик над учителя (своего), ниже раб над господина своего:

25 довлеет ученику, да будет яко учитель его, и раб яко господь его. Аще господина дому веельзевула нарекоша, кольми паче домашния его?