Православный молитвослов

Молитва после вкушения пищи

Благодарим Тя, Христе Боже наш, яко насытил еси нас земных Твоих благ; не лиши нас и Небеснаго Твоего Царствия, но яко посреде учеников Твоих пришел еси, Спасе, мир даяй им, прииди к нам и спаси нас.

Молитва ко Господу о путешествующих

Господи Иисусе Христе, Боже наш, истинный и живый Путю, состранствовати мнимому Твоему отцу Иосифу и Пречистей Ти Деве Матери во Египет изволивый, и Луце и Клеопе во Еммаус спутешествовавый! И ныне смиренно молим Тя, Владыко Пресвятый, и рабом Твоим сим (имена) Твоею благодатию спутешествуй. И якоже рабу Твоему Товии, Ангела хранителя и наставника посли, сохраняюща и избавляюща их от всякаго злаго обстояния видимых и невидимых врагов, и ко исполнению заповедей Твоих наставляюща, мирно же, и благополучно, и здраво препровождающа, и паки цело и безмятежно возвращающа; и даждь им все благое свое намерение ко благоугождению Твоему благополучно в славу Твою исполнити. Твое бо есть, еже миловати и спасати нас, и Тебе славу возсылаем, со Безначальным Твоим Отцем, и со Пресвятым и Благим и Животворящим Твоим Духом, ныне и присно, и во веки веков. Аминь.

Молитва ко Пресвятой Богородице о ненавидящих и обидящих нас

Царице моя Преблагая, надеждо моя, Богородице, приятелище сирых и странных Предстательнице, скорбящих радосте, обидимых Покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко волиши: яко не имам иныя помощи, разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.

Молитва ко Господу на умирение враждующих

Владыко Человеколюбче, Царю веков и Подателю благих, разрушивый вражды средостения и мир подавший роду человеческому, даруй и ныне мир рабом Твоим (имена): вкорени в них страх Твой и друг ко другу любовь утверди, угаси всяку распрю, отыми вся разгласия соблазны. Яко Ты еси мир наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Псалом 90

Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы, летящия во дни, от вещи, во тме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится. Обаче очима твоима смотриши, и воздаяние грешников узриши. Яко Ты, Господи, упование мое: Вышняго положил еси прибежище твое. Не приидет к тебе зло, и рана не приближится телеси твоему: яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змия. Яко на Мя упова, и избавлю и, покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его, долготою дней исполню его, и явлю ему спасение Мое.

Молитва Честному и Животворящему Кресту Господню

Да воскреснет Бог, и расточатся врази Его, и да бежат от лица Его ненавидящии Его. Яко исчезает дым, да исчезнут; яко тает воск от лица огня, тако да погибнут беси от лица любящих Бога, и знаменующихся крестным знамением, и в веселии глаголющих: радуйся, Пречестный и Животворящий Кресте Господень, прогоняяй бесы силою на тебе пропятаго Господа нашего Иисуса Христа, во ад сшедшаго, и поправшаго силу диаволю, и даровавшаго нам тебе Крест Свой Честный на прогнание всякаго супостата. О Пречестный и Животворящий Кресте Господень! Помогай ми со Святою Госпожею Девою Богородицею и со всеми святыми во веки. Аминь.

Молитва о защите дома от злых духов

Господи Боже спасения нашего, Сыне Бога живаго, на Херувимех носимый, превыше сый всякаго Начала и Власти, и Силы, и Господства: Ты еси велий и страшный над всеми сущими окрест Тебе; Ты еси сотворивый землю в крепости Твоей, и исправивый вселенную в премудрости Твоей; трясый поднебесную от оснований, столпы же ея неподвижны; глаголяй солнцу, и не возсияет, звезды же запечатлеяй, запрещаяй морю, и изсушаяй е: Егоже ярость тает Начала и Власти, и камение сотрошася от Тебе. Врата медная стерл еси, и вереи железныя сломил еси; крепкаго связал еси, и сосуды его раздрал еси; мучителя крестом Твоим низложил еси, и змиа удицею вочеловечения Твоего привлекл еси, и узами мрака, в тартаре посадив, связал еси. Сам убо, Господи, отжени и в бегство претвори всякое диавольское действо, и всякое сатанинское нахождение, всякий навет сопротивныя и належащия силы от крова сего, и от одержимых от него, и от обходящих под ним; вся сущия в дому сем сохрани, избавляя их от страха нощнаго, и стрелы, летящия во дни, от вещи, во тме преходящия, от сряща и демона полуденнаго. Яко Ты еси Боже утверждение мое, крепкий Обладатель, Князь мира, Отец будущаго века, и Царство Твое Царство вечное: и Тебе единаго есть Царство, и сила, и слава, со Отцем и Святым Духом, ныне и присно, и во веки веков. Аминь.

Молитва об обращении заблудших

Всевышний Боже, Владыко и Содетелю всея твари, наполняяй вся величеством Твоим и содержаяй силою Твоею! Тебе, вседаровитому Господу нашему, мы недостойнии (имена) благодарение приносим, яко не отвращаешися нас беззаконий ради наших, но паче предваряеши ны щедротами Твоими. Ты ко избавлению нашему послал еси Единороднаго Твоего Сына, и благовестил безмерное Твое к роду человеческому снизхождение: яко хотением хощеши, и ожидаеши, еже обратитися нам к Тебе и спасеным быти; Ты, снизходя к немощи нашего естества, укрепляеши нас всесильною Святаго Твоего Духа благодатию, утешаеши спасительною верою и совершенною надеждою вечных благ, и руководствуя избранных Твоих в Горний Сион, соблюдаеши яко зеницу ока. Исповедуем, Господи, великое Твое и безприкладное человеколюбие и милосердие. Но видяще многих поползновения, прилежно Тя, Всеблагий Господи, молим: призри на Церковь Твою, и виждь, яко Твое спасительное благовестие аще и радостно прияхом, но терние суеты и страстей творит оное в некиих малоплодно, в некиих же и безплодно, и по умножению беззаконий овии ересьми, овии расколом противящеся евангельской Твоей истине, отступают от достояния Твоего, отревают Твою благодать и повергают себе суду Твоего пресвятаго слова. Премилосердый и всесильный, не до конца гневайся, Господи! Буди милостив, молит Тя Твоя Церковь, представляющи Тебе Начальника и Совершителя спасения нашего, Иисуса Христа, буди милостив нам, укрепи нас в правоверии силою Твоею, заблуждающим же просвети разумныя очи светом Твоим Божественным, да уразумеют Твою истину: умягчи их ожесточение и отверзи слухи, да познают глас Твой и обратятся к Тебе, Спасителю нашему. Исправи, Господи, иных развращение и жизнь, несогласную христианскому благочестию. Сотвори, да вси свято и непорочно поживем, и тако спасительная вера укоренится и плодоносна в сердцах наших пребудет. Не отврати лица Твоего от нас, Господи, воздаждь нам радость спасения Твоего. Подаждь, Господи, и пастырем Церкве Твоея святую ревность, и попечение их о спасении и обращении заблуждающих духом евангельским раствори: да тако вси руководими достигнем, идеже совершение веры, исполнение надежды и истинная любовь. И тамо с лики честнейших Небесных Сил прославим Тебе, Господа нашего, Отца, и Сына, и Святаго Духа, во веки веков. Аминь.

Молитва от осквернения

Господи Боже наш, едине Благий и Человеколюбче, едине Святый и во святых почиваяй, Иже верховному Твоему апостолу Петру явивый видением, ничтоже скверно или нечисто мнети от Тебе сотворенных на пищу и в наслаждение человеком, и сосудом Твоим избранным, апостолом Павлом, вся чиста чистым заповедавый, Ты Сам, Владыко Пресвятый, призыванием страшнаго и пречистаго Твоего имене и знамением Честнаго и Животворящаго Креста благослови и очисти мя, раба Твоего (имя), оскверншагося от всякаго неприязненнаго духа, от всякаго мечтания и гада ядовитаго, от всякаго беззакония и от всякия лести, от всякаго потвора и от всякия суеты, и от всякаго недуга, и всякия язи, и от всякаго противнаго злодейства диаволя. И ныне недостойнаго мене, раба Твоего (имя), сподоби по Твоему милосердию служити Пречистым Твоим Тайнам. И прежде очисти ми душу и тело от всякия скверны и остави всякое прегрешение, вольное и невольное, еже согреших во вся дни живота моего делом, словом и помышлением, во дни и в нощи, и до нынешняго часа. И даждь ми, Господи, служение сие страшное Небесных чинов и причастие Пречистых Твоих Таин не в суд, ни во осуждение, но в прощение грехов и в Духа Святаго пришествие, и живот присносущныя радости, егоже уготовал еси истинным Твоим служебником. Сохрани мя, Владыко всесильне, от всякаго греха и злобы, соблюди нескверна и непорочна от всякия проказы противнаго диавола; и даждь ми, Господи, служити Тебе в преподобии и правде до последняго дне, и часа, и скончания моего: Ты бо еси благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем и Пресвятым и Благим и Животворящим Твоим Духом, ныне и присно, и во веки веков. Аминь.

Молитва ко Господу от ночных страхований

Господи Боже крепкий, приими со благостынею моление мя грешнаго, яви на мне окаянном милость Твою, истреби, Всеблагий, постыдное уныние, снедающее мя; сверзи меня, Милостивый, бремя, тяготящее мя; поспеши, Всесильный, на искоренение пагубных моих деяний; прекрати навсегда, Побеждающий, злоковарныя моя намерения; прожени, Всевышний, демонский мрак; расточи, Тайновидец, козни, обдержащия мя; сокруши, Непостижимый, нападения со мною борющагося; ум мой озари светом имени Твоего; всех искупивый Кровию Своею, осени жилище мое; сотвори покойным одр мой; соблюди ложе мое от сетей; сохрани волею Твоею угнетенную душу мою; невинным соделай Тобою дарованное дыхание плоти моея; огради мя ликом Небесных Сил; направи их сопротив демонских полчищ; даруй глубокое успокоение в мрачной нощи, предстательством и молитвами Пресвятыя Богородицы и всех избранных Твоих; сохраняя, сохрани зеницы ока моего во просвещение чувств: да при возложении надежды на Тя пребыв безвреден от волнующих смятений, мирских забот, нощных сновидений, демонских мечтаний, и воспрянув от тяжкаго сна, укреплюсь Тобою паки, и сим молитвенным гласом и исповеданием веры воспою Тебе, всеблагословенному Царю, неизреченныя славы хвалебныя пения, яко от всея твари благословен еси во веки веков. Аминь.

Молитва ко Господу о болящих

Владыко, Вседержителю, Святый Царю, наказуяй и не умерщвляяй, утверждаяй низпадающия и возводяй низверженныя, телесныя человеков скорби исправляяй, молимся Тебе, Боже наш, раба Твоего (имя) немощствующа посети милостию Твоею, прости ему всякое согрешение вольное и невольное. Ей, Господи, врачебную Твою силу с Небесе низпосли, прикоснися телеси, угаси огневицу, укроти страсть и всякую немощь таящуюся, буди Врач раба Твоего (имя), воздвигни его от одра болезненнаго и от ложа озлобления цела и всесовершенна, даруй его Церкви Твоей благоугождающа и творяща волю Твою. Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Молитва ко Господу об усопших

Помяни, Господи Боже наш, в вере и надежди живота вечнаго преставльшагося раба Твоего, брата нашего (имя), и яко Благ и Человеколюбец, отпущаяй грехи и потребляяй неправды, ослаби, остави и прости вся вольная его согрешения и невольная, избави его вечныя муки и огня геенскаго, и даруй ему причастие и наслаждение вечных Твоих благих, уготованных любящим Тя: аще бо и согреши, но не отступи от Тебе, и несумненно во Отца, и Сына, и Святаго Духа, Бога Тя в Троице славимаго, верова, и Единицу в Троице и Троицу во Единстве, православно даже до последняго своего издыхания исповеда. Темже милостив тому буди, и веру яже в Тя вместо дел вмени, и со святыми Твоими яко Щедр упокой: несть бо человека, иже поживет и не согрешит. Но Ты един еси кроме всякаго греха, и правда Твоя, правда во веки, и Ты еси един Бог милостей и щедрот, и человеколюбия, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.