Аскетика. Том I
Шрифт:
Творя убо труд сей, аще убо благопоспешна будет вещь пред тобою, благодари Богови и молися Тому. Сие бо есть оно: «о всем благодарите» (1 Сол. 5, 18). И да не вознерадим воздавати благодарение Богови. Якоже он, о немже рекл еси некогда притчу: яко отхождаше помолитися в церковь о устроении пищи, и срете его некто единою, глаголя: яко обедуй днесь со мною, таже иди помолися. И рече: не иду; сего бо отхождах просити у Бога. Но мы, аще обрящем аще не обрящем, молитву и благодарение да воздаем Богови. И блюди еже носити мертвость Иисуса в теле своем выну.
Ответ 7, тогожде великаго старца к томужде, имущу отыти с братиею собрати рукоделие и убоявшуся пустыни мест оных: и напоминание еже трезвитися ему противу стужающия ему телесныя брани: и обещание содействия Божия, ко тщимому им к ним отшествию.
Рцы позванному свыше Божественным мановением к нам жити: не точию в нынешнем веце, но и в будущем, брату нашему искренню и единодушну Иоанну: рече Владыка наш Христос Своим учеником: «не две ли птицы ценятся единым ассарием? и ни едина от них падет на землю без Отца Моего, Иже на небесех.
8. Тойжде довольно потруждся, и не обрет рукоделия, печаловаше, и удивляшеся, како по глаголу старцеву не послан бысть Ангел пред лицем его. Не разумеваше бо, яко сие речеся ему ко удоборешению отшельствия. И сего ради пишет ему старец сия.
Напиши братови: елико есть корабль на мори, приемлет беды и приражение ветров. Егда же достигнет в пристанище безмолвное и мирное, не ктому имать страх бед и скорбей, и приражений ветров, но в тишине будет. Тако и любы твоя: елико еси с человеки, ожидай скорбей и бед, и приражения мысленных ветров. Егда же достигнеши во уготованная тебе, тогда без страха будеши. А о немже предрекох, яко рече Владыка наш: «яко се послю Ангела Моего пред лицем твоим», то послан бысть. А о том еже не обрести рукоделия, рече Бог в Моисейстей книзе: «Сего ради обыде тя, и наказа тя, и гладом замори тя, в пустыни оней страшней, да уразумеются яже в сердце твоем» (Втор. 8, 2). Разумей глаголемая ти от мене, и твердо труждайся и несумненно, возлюбленне брате.
9. Послание тогожде великаго старца к томужде, отшедшу на ответ общежития, и за еже многую обрести скорбь, пренемогшу.
Напиши, чадо, брату нашему Иоанну целование о Господе, от мене и от тебе, и от брата нашего Иоанна. И рцы ему: да не уныеши в скорбех и телесных трудех, яже терпиши и трудишися нас ради и нашего ради общежития. Есть бо и сие, еже положити душу свою за братию, и надеюся, яко многа мзда труда сего. И якоже постави Бог Иосифа препитати братию свою во время глада во Египте, тако и тебе постави помощи общежитию сему, с чадом нашим Серидом. И аз глаголю ти апостольское слово, еже к Тимофею: «Ты убо, чадо, возмогай благодатию Духа Свята» (2 Тим. 2, 1). Вижду бо твое безмолвие, како имать приити, и сорадуюся тебе во Господе. Елико бо вне пребывавши, скорбь и труд телесный имаши обрести: егда же достигнеши в пристанище безмолвия, покой и мир обрящеши. Не ложен бо есть Владыка наш глаголяй: яко дам им в нынешнем веце сторицею, и во грядущем живот вечный. Усердно убо потрудися, брате, яко да обрящеши многшу любовь и покой. Прежде даже достигнути кораблеви пристанища, бием и обуреваем бывает от волн и бурей. Егда же достигнет, обретается прочее во мнозей тишине. Разумей глаголемая и сохрани, да даст же ти Господь разум во всем.
Ответ 10, тогожде великаго старца к нему, камени падшу на ногу его, и многу в нем подвигшу болезнь и скорбь.
Возлюбленному брату Иоанну о Господе радоватися. По труду тела твоего, иже нас ради, и сокрушению ноги твоея Бога ради, да исполнит Владыка Бог душу твою, любимиче мой, небесных благ сторицею. Уразумей пишемая тебе от мене, брате, и сокрый у себе самого. Сотворит бо сие тя услышати радование небесно, Владычне, Божеско. О имени бо Святыя Троицы обретаю, яко снаследник еси моих дарований, данных мне от Бога. И по восхождению чаю, яко скоро достигнеши. Есть бо трудами по Богу достизаяй в покой Его. Есть паки смирения ради достизаяй в онь. Надеюся же, яко и по обоим имети будеши, внегда умрети гневу от тебя, востягненней бывшей ярости от сердца твоего. И тогда исполнится на тебе слово писанное: «Виждь смирение мое и труд мой, и остави вся грехи моя» (Пс. 24, 18). И понеже рех: яко по восхождению достигнеши: разсмотри благовестия, како и коликожды даде Христос дарования учеником о исцелениих, и изгнаниих бесов; совершенство же о отпущении грехов, рек им: имже отпустите грехи, отпустятся. Аще убо труда ради твоего, суща Бога ради, отпустит тебе согрешения твоя: се есть мера она, еяже хощу тебе достигнути. Аще же неудобьразумныя глаголы в послании сем прочтеши, то вопроси единодушнаго ти Серида, сына же моего возлюбленнаго, и благодатию Божиею скажет ти неудобьразумная. Молихся бо Богу за него и о сем. Ты убо, человече Божий, неослабно тецы путь уготованный, яко да с радостию достигнеши Христова пристанища, егоже достигохом: и услышиши глас исполненный радости, и жизни, и света, и радования, глаголющ к тебе: «Добре, рабе благий и верный, о мале был еси верен, над многими тя поставлю: вниди в радость Господа твоего» (Мф. 25, 21). Радуйся о Господе, радуйся о Господе, радуйся о Господе. Господь да сохранит душу твою, и тело, и дух твой от всякаго зла, и от всякия противности диавольския, и от всякаго мечтания мятежлива. Господь будет ти свет, покров твой, путь твой, крепость твоя, венец радования и заступление вечно. Внемли себе: писано бо есть: «исходящих от уст Моих не отвергуся» (Пс. 88, 35).
Ответ 11, тогожде великаго старца к нему, советующ ему выну поминати пишемая ему, в пользу его и утверждение сердца его.
Рече Соломон о родителех своих: «иже и учиша мя, и глаголаша: да утверждается слово наше в сердце твоем» (Притч. 4, 4). Тако и аз ти
глаголю, брате: да утверждаются словеса моя в сердце твоем, и размышляй вся пишемая ти от мене выну: якоже рече Бог усты Моисея: «и навяжеши я на десную твою руку, и да будут непоколеблема пред очима твоима выну, и поучайся в них лежа и востая, и идый путем, и седяй в дому» (Втор. 6, 8, 7). Покажи убо таяжде совершенством дел, и Бог мой будет с тобою, вовеки. Аминь.Ответ 12. Тойже заповеда брату дело: и яко не сотвори того скоро, запрети ему: брату же опечалившуся, помыслил есть не ктому рещи что-либо некоему от братий. И к сему явил есть ему старец сия:
Рцы братови Иоанну: время сие слабо есть, и многим трудом обрящеши в нынешнее время человека имуща твердо сердце. Но держи слова святаго апостола глаголюща: «обличи, запрети, умоли со всяким долготерпением и учением» (2 Тим. 4, 2).
Ответ 13. Зданию бывшу в общежитии, той, яко искусен, начерта меры дела, и отай его нецыи от братий, аки добро нечто мняще творити, приложиша к тем, и мало нечто повредиша, и смутившуся ему, и унывшу от тех: являет ему старец сия.
Рцы единомысленному нам брату Иоанну: многа пишемая тебе от мене рукою приснаго и возлюбленнаго чада нашего, от всея своея души любящаго нас триех равно совершенною любовию. И сия вся не от своея воли пишу, но повелением Святаго Духа. Вся же ко исправлению и пользе души и совести внутреннего человека: к скорби же и наказанию тела и сокрушению сердца твоего. Первое блюдися от духа уныния: рождает бо всяко зло и различну вещь. Аще бо напишу ти искушения, яже претерпех, глаголю ти, яко еще не снесут уши твои, но негли ниже инаго кого во время сие. Надеюся же, яко доспееши: не точию же, но и самозрителне увидети я имаши, и избавитися от них благодатию Христовою, чрез веру. Почто разслабляется сердце твое пренемоганием, от овец Христовых? Или не веси, яково главоболение претерпевает добрый учитель от детей, дондеже успеют? И паче яко услышал еси от мене апостольское слово оно: яко «обличи, запрети, умоли со всяким долготерпением и учением» (2 Тим. 4, 2). Услыши и внемли, яже глаголю ти: долготерпение родительница есть всех благ. Разсмотри Моисея, избравша себе «паче страдати с людьми Божиими, нежели имети временную греха сладость» (Евр. 11, 25). Егда убо смущает тя помысл от беса на некоего человека, рцы помыслу с долготерпением: еда повинухся аз Богови, яко да порабощу иныя и престанет от тебе. Твердо и крепко тецы, поминая моя словеса, паче же Господня, яко да и ты постигнеши нас, о Христе Иисусе Господе нашем: буди, буди.
Ответ 14, тогожде великаго старца к томужде, яко тяжко понесе услышав, яко некий от братий, аки охуждая его, глаголаше: кто бо есть сей, или откуду, яко он скорбит?
Рцы братови: якоже препирашеся (Архангел) Михаил о телеси Моисеови: тако подвизаюся о тебе, дондеже избавишися от ветхаго человека. Роптаху бо иудее, о Спасителе глаголюще: «не Сей ли есть Сын Иосифов? не Матерь ли и братию (Его) знаем?» (Ин. 6, 42) Сия помысли, и претерпи до конца.
Ответ 15, тогожде великаго старца к томужде, не у чисту бывшу от тояжде печали.
Рцы братови: помянух пророчество святаго Иеремии пророка, глаголюща: «кто даст главе моей воду, и очесем моим источник слез, и плачуся о людех сих день и нощь» (Иер. 9, 1), чаях бо тя твердою пищею препитати, и вижду тя паки требующа млека. Виждь, что писано есть: «от тайных моих очисти мя» (Пс. 18, 13). Блюди, да не окрадут тя лукавии змии и ввергут в тя яд свой: смертен бо есть. Никто же бо когда исправляет злым благое, побеждается бо злым: но благим исправляется злое. Се убо стоиши на позорищи: со зверми братися должен еси, по апостолу во Ефесе: «победив бо зверей хваляшеся» (1 Кор. 15, 32). В бурю ввержен еси морскую, претерпети беды многи, и сподвизатися против обуревания волн должен еси; и тако победив, Богу помогающу приидеши с нами в тихое пристанище, о Христе Иисусе Господе нашем, Емуже слава вовеки: аминь.
Ответ 16, тогожде великаго старца к томужде, имущу смутится на братию, о бывшем потреблении плинфов от дождя: сие бо приписоваше нерадению их. Предусматривая же, яко и авву хощет за сие укорити, предутверждает его, и возбуждает к истинней правости помыслов: воспоминая и искреннюю любовь, юже к нему авва имать, яко да таковою памятию противный оный отринет помысл.
Сотвори любовь, чадо, и ускори принести хартию и чернило, и остави вещь, еяже ради пришел еси, и напиши братови Иоанну прежде целование от мене. Стужаем бо есть, еже смутити других, и смутится от других, и рцы ему: радуйся о Господе, брате мой. Аще многи суть волны морския, то несть ли возбуждаяй Иисуса, яко да запретит ветром и морю, и будет тишина, еже разумети Иисуса и поклонится ему. Аще вся суетна суть и привременна, то почто теми стужаемо есть сердце наше, еже забвение прияти о евангельском оном словеси, яко: «кая польза человеку, аще мир весь приобрящет, душу же свою отщетит?» (Мф. 16, 26). Уразумей, брате мой, яко аще кто оскорбляет кого, или делом, или словом, послежде сам оскорбляем бывает сторицею. И множицею написани быша от мене Писания глаголы Господни, еже долготерпети во всех, и внимати, еже не быти смешенней воли твоей с чим. Но аще послеши ми вопрос с возлюбленным сыном моим Серидом, присно скорбящим, внегда видети тя скорбяща: потщися прилежно испытатися с помыслы твоими, да не како ввергут смертен яд в сердце твое, еже прелститися тебе, непщующу велбудом быти комара, и камышек каменем: и обретается человек имеяй бервно, и смотрящ на сучец. Аки души моей писах ти, вем бо, яко возрадоватися имать сердце твое от сих. «Обличи бо, рече, премудра» (Притч. 9, 8) и прочее: и веси, како имам тя в любви Христовой, брате. Надеюся, яко близ еси, еже прочее без попечения быти о земных вещех, и обрестися в духовном отец делании. Не бо постыдит мя Господь мой Христос, молящася Ему день и нощь о тебе.