Аскетика. Том I

Вопрос 473. Понеже рекл еси, отче, яко, прежде неже начати беседу, должно разсмотрети помысл: что убо, егда требует нужда рещи слово, или егда сежу на беседе? И да не явлюся молчанием приступити, хощу и аз проглаголати ко глаголемым, и не вижду явнаго греха в том слове, но мнится мне доброе быти, или среднее: что убо повелеваеши, да сотворю, не имея времене совершенно разсудити, есть ли в нем сокровенный грех?

Ответ. Аще доброе явится слово, или и среднее, и ищет потреба глаголану быти ему, обаче аще видиши от слова того будущее тебе тщеславие, или от похвалящих тя слышателей, или как-нибудь: должно предутвердити помысл не прияти тщеславия. Аще ли же видиши, яко побеждаешися от него, лучше есть умолчати, нежели предприяти.

Вопрос 474. Явил ми еси, отче, яко бываемая со смущением и тщеславием от бесов суть. И благодарю Господу, просветившему мя духовным вашим учением, и даровавшему грешником чрез святых познати путь живота. Но молю и сему научи мя, что есть оправдание?

Ответ. Оправдание есть, еже хваления убо не имать, отрицается же греха: якоже во Адаме, и Еве, и Каине, и таковых. Согрешивше бо, и хотяще себе оправдити, отрекошася согрешения.

Вопрос 475. Есть, егда не точию влагает мне смущение, но и понуждает мя сотворити вещь, или рещи слово: случается же, егда вопреки удерживает мя исполнити слово, или дело, и противостоит пресещи хотя. Что убо сотворю?

Ответ. Предрех, яко о всяком помысле и деле подобает разсуждати, добро ли есть или ни. Еже нерадити творит о всех сих. И аще убо будет добро, сотвори е. Аще ли же ни, да не сотвориши. Обаче, да не доброе с молвою будет, истязовати подобает владычественный помысл, с каким разумом сия творит. И аще по страху Божио истяжеши, то не попустит Бог заблудити: како бо, «егда собою клятся, глаголя: живу Аз, глаголет Господь, не хощу смерти грешника, но еже обратитися и живу быти ему» (Иез. 33, 11)?

Наипаче зря тебе, истязующа помысл о спасении души, и еже к Нему обращении. Везде убо призывай имя Божие.

Вопрос 476. Иногда призываю имя Божие, но обаче остает в помысле якоже некая тяжесть от сих. Коль краты убо подобает призывати?

Ответ. Довлеет единою, и приложити да не стерпиши, но вознеради о тяжести: от бесов бо есть. Сие же глаголю, внегда не запрещено есть побеседовати, или удержати дело, за еже добру быти тому, или средню. Тогда бо довольно будет единожды, или ноне трижды.

Вопрос 477. Егда хощу возглаголати добро дело, или сотворити, и бояся, еже не быти мне в нем смущения в сердце, убегаю его: убо добру ли творю или ни?

Ответ. Аще хотя дело творити или глаголати боишися, да не како подвижется тебе от того смущение, и сего ради убегаеши того, то не право твориши. Плещи бо подаеши врагу, и неизбежиши смущения. Не скудно бо ему во всяком деле влагати тебе смущение: и горша будет ти страсть. А от еже сотворити дело с молитвою и страхом Божиим, помощию Божией упраздняется смущение.

Вопрос 478. И како рекл еси ми, отче, яко добро есть молчание? аще убо сего употреблю, мнюся бегати, и вреждаюся. Како убо есть?

Ответ. Егда по постничеству употребляеши молчание, тогда добро есть. Аще же не тако, но, бояся смущения, молчиши, то вредно есть.

Вопрос 479. А понеже человека самовластна сотворил есть Бог, и не нудит его сотворити правду: рцы ми, отче, како помогает обидимому? И како речено есть: «отметает мысли людей, и отметает советы князей» (Пс. 32, 10)? И помолися о мне, яко да избавлюся от диавольскаго неверия, и трезвлюся в духовном вашем учении.

Ответ. Бог не принуждает сотворити правду, за самовластие. Но аще обидим бывает кто, и будет достоин избавитися от обиды тоя, то возбраняет Бог обидящаго, и не вменяется ему в правду, за еже зло имети произволение и произволяти ему исполнити всяку обиду: обидяху бо халдеи сущих с Азариею, мещуще их в пещь огненную; и понеже достойни бяху еже избавитися, пощади их Бог, и удержа огнь обидити их. И не приписуем правду сию халдеом, за еже злую имеяху волю: но Богови, раззорившему советы языков, ради боящихся Его. И аще и удержано будет зло достойных ради, но обидливии достойно зол обиды своея приемлют мзду. Внемли себе, да не заблудиши от истины, в нюже приведе тя Бог славы, молитвами святых. Аминь.

Вопрос 480. Брат, вкупе делая с инем братом, ударен бысть от него по действу диаволю. И от сея вины смутився, восхоте разлучитися от еже вкупе делати с ним. И вопросил есть великаго старца о сем.

Ответ Варсануфия. Брате, о нихже вопросил еси, да не возмятешися, еже сотворити что-либо со смущением: паче же о человеце смущение от помыслов, и зависти диаволи; якоже и ты искушен был еси, и возсвирепел был еси от помыслов на время. И аще помянеши, яко и ты тогда пострадал еси, то не уничижиши брата твоего во искушении его. Мнози бо немощствующии от помрачения мозга, бываемаго от лютейшия огневицы, что-нибудь тогда и напоминают и глаголют: и аще и досаждают здравым сущим и служащим тем, не ведят: пообладал бо есть теми недуг. Тако и ныне, аще и речет кто ему о враче, то не приемлет врачбы; ниже бо весть, что ему полезно есть, и аки суесловие приемлет глаголемая ему от кого, и досаждая, и гневаяся, и прося снедей, вредящих паче, нежели пользующих, — не весть, что творит. Тако есть искушаемый: аще и погубляет душу свою, не весть. Аще и святым, состраждущим ему о душе его, досадит или уничижит их, не весть: упися бо страстию недуга по действу сопротивнаго, присно извращающаго ему вещи, дондеже сотворит его отрещися и Самаго Бога. Тако и зде в части сей. Но ведый сия, и яко смотрительне попущает Бог нам искушенных быти, да искусни явимся Ему; да претерпеваем ближнему во время немощи его, чувственныя же и мысленныя. «Друг друга бо, глаголет, тяготы носите, и тако исполните закон Христов» (Гал. 6, 2). Убо аще кто согласится с немощствующим, то сие не в том есть, еже творити волю его, или во еже дати ему вредящая его, но в сем, еже понести досады его, и сохранитися не дати что ему вредящее. Тако и зде в части сей. Не в том, еже сотворити волю немощствующаго, есть попечение оно, но в том, еже молитися о нем. И аще не будет доволен, то да помолится могущим умолити Бога избавити того от належащаго ему искушения, — и бывает таковый, якоже Марфа и Мариа, сестры Лазаревы, глаголавшия ко Владыце воскресити брата их. И аще сотворит кто сия, да не велие возмудрствует. Якоже бо бывает ему от инех, тако и той творит. «В нюже бо меру мерит кто, возмерится ему» (Мф. 7, 2). И да не вознепщуеши, ударен быв от него, яко велие нечто пострадал еси: зане Господь небесе и земли биен бысть, и вся прочая пострада. И да не поколеблешися от места своего прейти и отлучатися от брата твоего: не бо есть по Богу, но исполнение воли диаволи. Аще ли сотвориши сие, то ни тако почиет, но еще в горшее приидет. От зла бо ниединоже бывает благо. Но сие есть непокорение и неразумие: «идеже бо рвение и зависть, ту нестроение, и всяка зла вещь» (Иак. 3, 16). Никтоже исцеляется от сих во век, точию отсецаяй свою волю, и подвизаяйся не любопытствовати ближняго, ниже рещи когда, что есть сие или оно? Глаголяй же, сие и аз хощу, сын диаволь бывает, и чуждь Бога. И явно есть, яко свою волю хощет сотворити, а не волю Божию. Мужайся, брате. Бог да покрыет тя. И от всея души помолися о брате твоем, и возлюби его о Христе Иисусе Господе нашем, Емуже слава вовеки. Аминь.

481. Прошение. Брат проси тогожде великаго старца помолитися о нем. Прости мя, яко много стужаю тебе. Но веруя в Бога, яко молитвами твоими укрепит мя, и не ктому стужаю ти толико.

Ответ Варсануфия. Елицы суть чада Божия, то и наследницы всяко благодати и долготерпения, и кротости Его, и человеколюбия и любве суть. Аще бо чада Божия, то и бози суть. Аще бози, то и господие. И аще свет есть Бог, то и тии светильницы. Аще убо стужение имеет просимый Бог и унывает, то и тии. Аще же не скорбит просим, просим же радуется, то и тии. «Взыщи ближняго своего, яко самаго себе», глаголет Ветхое Писание (Лев. 19, 18). Новое же, показующе совершенство, глаголет душу полагати за друг друга: якоже Совершенный и Сын Совершеннаго душу Свою о нас положил есть. Просими убо святии радуются, совершенни суще, якоже Отец их совершен есть. Просите убо их, и подадут вам неленостно: не бо суть, якоже аз, разслаблени и лениви. И помолитися быти мне в сих: и воспрошу у Бога дати вам прошения ваша, прежде, силу свыше, и любовь к Нему, и да утвердит во страсе Своем и вере сердца ваша. Пребудите убо не сумнящеся о приятии милости от Него: и Той сотворит, по преизбыточестию, ихже просим, или разумеем. Тому слава, вовеки. Аминь.

Вопрос 482. Брат вопроси авву общежития, в немже бяху святии старцы, дати ему близ их келлию. И согласися дати. Отыде же в тое время к некоему монаху, и моли его оный вселитися в особную ему келлию. Брат же отвеща, яко не может сего сотворити без совета старцев и аввы, согласившегося дати ему келлию. И, пришед, вопроси инаго старца, что подобает сотворити?

Ответ Иоанна. Брате, Господь нам заповеда — друг друга честию больша себе творити. Аще убо любве ради, юже к тебе имамы по Богу, речем тебе яко при нас вселися, то делом покажем, яко себе предпочитаем брату. Аще ли же паки речем тебе, яко при оном пребуди, негли помыслит любы твоя, яко отреваем тя от нас, аки не имуще любве к тебе. Но ты искуси соседство мест сих, и пользу души твоея из них, и употреби слова апостола, глаголюща: «вся искушающе, доброе держите» (1 Фес. 5, 21). Сия от яже по Богу, любве глаголах. Прости мя, брате мой, Господа ради.

Вопрос 483 к великому старцу. Инок некий, живя в чуждей келлии, созда себе близ келлию. И прииде к нему некий брат, требуяй келлии, и дозволи ему он вселитися в созданной им келлии: сей же взысковаше даровати ему сию с подписанием. И согласися даровати, аще дозволят сие старцы, с тем обаче, еже бы почерпати на всяку седмицу от воды, яже есть в той сосуда два. И вопросиша великаго старца о сем.

Ответ Варсануфия. Сие несть иноческо. Аще бо писания хощете от друг друга, то и на суд имате ходити. Дело сие не есть любве. Но паче безписменно да живет брат в келлии: и аще восхощет господин келлии на время извести его, то со смирением должен изыти, ничтоже отнюд противуглаголя. Аще ли же и сам господин келлии тоя отыдет, хотя наполнити два сосуда своя воды, и не подаст ему он, пребываяй в келлии, то ниже той должен смутитися, но сотворити со смирением метание, и прияти сосуд празден, и отыти глаголя тому: прости мя, Господа ради, брате, яко оскорбих тя, и помолися о мне. Должен же и внимати себе, да по сих невозмятется от гнева. И, смирения ради его, покрыет Бог и брата его от вражды диаволи, и умилится потещи в след его, и положити ему метание, якоже возвратитися и наполнити, или и подержати с ним сосуд. И тогда любы Божия покрыет обоих, и спасет их человеколюбец Бог.