Библия (на цсл. гражданским шрифтом)

6 взыдем во иудею, и собеседовавше с ними отвратим я к нам и воцарим в ней сына тавеилева:

7 сия же глаголет Господь саваоф: не пребудет совет сей, ниже сбудется,

8 но глава араму дамаск, и глава дамаску расин: но еще шестьдесят и пять леть, оскудеет царство ефремово от людий,

9 глава же ефремови соморон, и глава соморону сын ромелиев: и аще не уверите, ниже имате разумети.

10 И приложи Господь глаголати ко ахазу, рекий:

11 проси себе знамения от Господа Бога твоего во глубину, или в высоту.

12 И рече ахаз: не имам просити, ниже искушу Господа.

13 И рече (исаиа): слышите убо, доме давидов: еда мало вам есть труд даяти человеком, и како даете Господеви труд?

14 Сего ради даст Господь сам вам знамение: се, Дева во чреве зачнет и родит сына, и наречеши имя ему еммануил:

15 масло и мед снесть, прежде неже разумети ему изволити злая, или избрати благое:

16 зане прежде неже разумети отрочати благое или злое, отринет лукавое, еже избрати благое, и оставится земля, еяже ты боишися, от лица двух царей.

17 Но наведет Господь на тя и на люди твоя и на дом отца твоего дни, иже еще не пришли, от дне в оньже отя ефрема от иуды, царя ассирийска.

18 И будет в той день, позвиждет Господь мухам, яже владеют частию реки египетския, и пчеле, яже есть во стране ассирийстей:

19 и приидут вси и почиют в дебрех страны и в пещерах каменных, и во вертепех и во всяцей разселине и во всяцем древе.

20 В день оный обриет Господь бритвою наятою об ону страну реки царя ассирийска, главу и власы ног, и браду отимет.

21 И будет в той день, кормити будет человек юницу от волов и две овце:

22 и будет от множества творения млечнаго, масло и мед снесть всяк оставыйся на земли.

23 И будет в той день, всяко место, идеже аще будет тысяща лоз винограда, по тысящи сикль, в лядину будет и в терние:

24 со стрелою и луком внидут тамо, яко лядиною и тернием будет вся земля:

25 и всяка гора оремая возорется, не найдет тамо страх: будет от лядины и от терния в паству овцам и в попрание волу.

Глава 8

1 И рече Господь ко мне: приими себе свиток нов велик и напиши в нем писалом человечим, еже скоро пленение сотворити корыстей, приспе бо:

2 и свидетели мне сотвори верны человеки, урию иереа и захарию сына варахиина.

3 И приступих ко пророчице, и во чреве зачат и роди сына. И рече Господь мне: нарцы имя ему: скоро плени, нагло расхити,

4 зане прежде неже разумети отрочати назвати отца или матерь, приимет силу дамаскову, и корысти самарийския пред царем ассирийским.

5 И приложи Господь глаголати ко мне еще, глаголя:

6 понеже не восхотеша людие сии воды силоамли текущия тисе, но восхотеша имети рассона и сына ромелиева царя над вами,

7 сего ради се, возводит Господь на вы воду реки сильну и многу, царя ассирийска и славу его: и взыдет на всяку дебрь вашу, и обыдет всяку стену вашу,

8 и отимет от иудеи человека, иже возможет главу воздвигнути, или могущаго что совершити: и будет полк его, во еже наполнити ширину страны твоея, с нами Богъ!

9 Разумейте, языцы, и покаряйтеся, услышите даже до последних земли: могущии, покаряйтеся: аще бо паки возможете, паки побеждени будете,

10 и иже аще совет совещаете, разорит Господь, и слово, еже аще возглаголете, не пребудет в вас, яко с нами Бог.

11 Тако глаголет Господь: крепкою рукою не покаряются хождению пути людий сих, глаголюще:

12 да не когда рекут: жестоко: все бо, еже аще рекут людие сии, жестоко есть: страха же их не убойтеся, ниже возмятитеся.

13 Господа сил, того освятите, и той будет тебе в страх.

14 И аще будеши уповая на него, будет тебе во освящение, а не якоже о камень претыкания преткнешися, ниже яко о камень падения: домове же иаковли в пругле, и в раздолии седящии во Иерусалиме.

15 Сего ради изнемогут в них мнози, и падут, и сокрушатся, и приближатся, и яти будут человецы в твердыни суще.

16 Тогда явлени будут печатлеющии закон, еже не учитися.

17 И речет: пожду Бога отвращшаго лице свое от дому иаковля и уповая буду нань.

18 Се, аз и дети, яже ми даде Бог: и будут знамения и чудеса в дому израилеве от Господа саваофа, иже обитает на горе сион.

19 И аще рекут к вам: изыщите чревоволшебников и от земли возглашающих, тщесловующих, иже от чрева глашают, не язык ли к Богу своему взыщет? что испытуют мертвыя о живых?

20 Закон бо в помощь даде, да рекут не якоже слово сие, заньже не леть дары даяти.

21 И приидет на вы жесток глад, и будет, егда взалчете, скорбни будете и зло речете князю и отечеству:

22 и воззрят на небо горе, и на землю низу призрят, и се, скудость тесна и тма, скорбь и теснота и тма, якоже не видети: и не оскудеет в тесноте сый даже до времене.

Глава 9

1 Сие прежде испий, скоро твори, страно завулоня и земле неффалимля, и прочии при мори живущии, и об ону страну иордана, галилеа языков.

2 Людие ходящии во тме видеша свет велий: живущии во стране и сени смертней, свет возсияет на вы.

3 Множайшии людие, яже извел еси, в веселии твоем: и возвеселятся пред тобою, якоже веселящиися в жатву, и якоже веселятся делящии корысти.

4 Зане отятся ярем лежай на них, и жезл, иже на выи их: жезл бо истязующих разсыпа Господь, якоже в день, иже на мадиама.

5 Яко всякую одежду собранну лестию и ризу с примирением отдадут, и восхотят, да быша огнем сожжены были.

6 Яко отроча родися нам, Сын, и дадеся нам, егоже началство бысть на раме его: и нарицается имя его: велика совета ангел, чуден, советник, Бог крепкий, властелин, Князь мира, Отец будущаго века: приведу бо мир на князи, мир и здравие ему.

7 И велие началство его, и мира его несть предела на престоле давидове и на царстве его, исправити е и заступити его в суде и правде, отныне и до века: ревность Господа саваофа сотворит сия.