Библия (на цсл. гражданским шрифтом)

17 И будет по седмидесятих летех, присещение сотворит Бог тиру, и паки возставится на прежднее и будет торжище всем царствам вселенныя на лицы земли.

18 И будет его купля и мзда свято Господеви, не им собрано будет, но живущым пред Господем, вся купля его, ясти и пити и наполнитися, и в сытость, на память пред Господем.

Глава 24

1 Се, Господь разсыплет вселенную и опустошит ю, и открыет лице ея и расточит живущыя на ней.

2 И будут людие аки жрец, и раб аки господин, и раба аки госпожа: будет купуяй яко продаяй, и взаим емляй аки заимодавец, и должный аки емуже есть должен.

3 Тлением истлеет земля, и расхищением расхищена будет земля: уста бо Господня глаголаша сия.

4 Восплакася земля, и растленна бысть вселенная, восплакашася высоцыи земли.

5 Земля бо беззаконие сотвори живущих ради на ней, понеже преступиша закон и измениша заповеди, разрушиша завет вечный.

6 Сего ради проклятие пояст землю, яко согрешиша живущии на ней: сего ради убози будут живущии на земли, и останется человеков мало.

7 Восплачется вино, возрыдает виноград, возстенут вси радующиися душею.

8 Престало есть веселие тимпанов, преста высокодерзость и богатство нечестивых, престал есть глас гуслей:

9 усрамишася, не пиша вина, горька бысть сикера пиющым.

10 Опусте всяк град, заключит храм, еже не внити.

11 Плачитеся о вине всюду, престала есть радость вся земная, отиде вся радость земли.

12 И останут гради пусти, и домове оставлени погибнут.

13 Сия вся будут на земли среди языков: якоже аще кто отрясает масличину, тако отрясут их: и (якоже) аще останет от оымания винограда,

14 сии гласом возопиют: оставшиися же на земли возрадуются со славою Господнею, возмятется вода морская.

15 Сего ради слава Господня во островех будет морских, имя Господне прославлено будет.

16 Господи Боже израилев, от крил земных чудеса слышахом, надежда благочестивому: и рекут: (горе хулящым, иже хулят закон,) горе преступником, иже преступают закон.

17 Страх и пропасть и сеть на вас живущих на земли.

18 И будет, бежай страха впадет в пропасть, и излазяй из пропасти имется в сеть: яко окна с небесе отверзошася, и потрясутся основания земная.

19 Мятежем возмятется земля, и скудостию оскудеет земля.

20 Преклонися и потрясеся земля аки овощное хранилище, и аки пиян и шумен падет и не возможет востати, преодоле бо на ней беззаконие.

21 И будет в той день, наведет Господь на утварь небесную руку и на цари земныя.

22 И соберут собрание ея и затворят в тверди и в темницы: мноземи роды будет посещение их.

23 И истает плинфа и падет стена, и устыдится луна и посрамится солнце: яко воцарится Господь в сионе и во Иерусалиме и пред старейшины славен будет.

Глава 25

1 Господи Боже мой, прославлю тя, воспою имя твое, яко сотворил еси чудная дела, совет древний истинный: да будет, Господи.

2 Яко положил еси грады в персть, грады твердыя, еже пасти основанием их, нечестивых град да не созиждется во век.

3 Сего ради благословят тя людие нищии, и гради человеков обидимых возблагословят тя.

4 Был бо еси всякому граду смиренному помощник, и изнемогающым за оскудение покров, от человек злых избавиши их: покров жаждущих, и дух человеков обидимых.

5 Аки человецы малодушнии жаждущии в сионе, яко избавиши их от человек нечестивых, имже нас предал еси.

6 И сотворит Господь саваоф всем языком: на горе сей испиют радость, испиют вино,

7 помажутся миром на горе сей: предаждь сия вся языком: той бо совет на вся языки.

8 Пожре смерть возмогши, и паки отят Господь Бог всякую слезу от всякаго лица: поношение людий отят от всея земли, уста бо Господня глаголаша (сия).

9 И рекут в день оный: се, Бог наш, наньже уповахом, и спасет нас: сей Господь, потерпехом его, и возрадовахомся и возвеселихомся о спасении нашем.

10 Покой даст Бог на горе сей, и поперется моавитида, якоже топчут ток колесницами.

11 И воздвигнет руце свои, якоже и той смири, еже погубити: и смирит гордыню его, на няже руце возложи.

12 И высоту убежища ограды твоея смирит, и обнизится даже до земли.

Глава 26

1 В той день воспоют песнь сию в земли иудейстей, глаголюще: се, град крепок, и спасение нам положит стену и ограждение.

2 Отверзите врата, да внидут людие хранящии правду и хранящии истину,

3 приемлющии истину и хранящии мир.

4 Яко на тя надеянием надеяшася, Господи, во век, Боже великий, вечный,

5 иже смирив низвел еси живущыя в высоких: грады крепкия разориши и обнизиши я даже до земли.

6 И поперут я ноги кротких и смиренных.

7 Путь благочестивых прав бысть, и приуготован путь благочестивых.

8 Путь бо Господень суд: уповахом на имя твое и память, еяже желает душа наша.

9 От нощи утренюет дух мой к тебе, Боже, зане свет повеления твоя на земли: правде научитеся, живущии на земли.

10 Преста бо нечестивый: всяк, иже не научится правде на земли, истины не сотворит: да возмется нечестивый, да не видит славы Господни.

11 Господи, высока твоя мышца, и не ведеша, разумевше же постыдятся: ревность приимет люди ненаказанныя, и ныне огнь супостаты пояст.

12 Господи Боже наш, мир даждь нам, вся бо воздал еси нам.

13 Господи Боже наш, стяжи ны: Господи, разве тебе иного не вемы: имя твое именуем.

14 Мертвии же живота не имут видети, ниже врачеве воскресят: сего ради навел еси и погубил еси, и взял еси всяк мужеск пол их.

15 Приложи им зла, Господи, приложи зла славным земли.

16 Господи, в скорби помянухом тя, в скорби мале наказание твое нам.

17 И яко болящая приближается родити и в болезни своей воскрича, тако быхом возлюбленному твоему.

18 Страха ради твоего, Господи, во чреве прияхом и поболехом, и родихом дух спасения твоего, егоже сотворихом на земли: не падемся, но падутся вси живущии на земли.

19 Воскреснут мертвии и востанут иже во гробех, и возрадуются иже на земли: роса бо, яже от тебе, изцеление им есть, земля же нечестивых падет.