Библия (на цсл. гражданским шрифтом)

16 Видевшии тя удивятся о тебе и рекут: сей человек раздражаяй землю, потрясаяй цари,

17 положивый вселенную всю пусту и грады ея разсыпа, плененых не разреши.

18 Вси царие языков успоша в чести, кийждо в дому своем.

19 Ты же повержен будеши в горах, яко мертвец мерзкий со многими мертвецы изсечеными мечем, сходящими во ад.

20 Якоже риза в крови намочена не будет чиста, такожде и ты не будеши чист, зане землю мою погубил еси и люди моя избил еси: не пребудеши в вечное время, семя злое.

21 Уготови чада твоя на убиение грехами отца твоего, да не востанут и наследят землю и наполнят землю ратьми.

22 И востану на ня, глаголет Господь саваоф, и погублю имя их, и останок, и семя: сия глаголет Господь.

23 И положу вавилона пуста, яко вогнездитися ежем, и будет ни во чтоже: и положу и брения пропасть в пагубу.

24 Сия глаголет Господь саваоф: якоже глаголах, тако будет, и якоже совещах, тако пребудет,

25 еже погубити ассириан на земли моей и на горах моих: и будут в попрание, и отимется от них ярем их, и слава их от рамен их отимется.

26 Сей совет, егоже совеща Господь на всю вселенную, и сия рука на вся языки вселенныя:

27 яже бо Бог святый совеща, кто разорит? и руку его высокую кто отвратит?

28 В лето, в неже умре ахаз царь, бысть глагол сей:

29 не радуйтеся, вси иноплеменницы, сокрушися бо ярем биющаго вы: от семене бо змиина изыдут изчадия аспидов, и изчадия их изыдут змии парящии:

30 и упасутся убозии им, нищии же человецы в мире почиют: и потребит гладом семя твое, и останок твой избиет.

31 Восплачитеся, врата градов, да возопиют грады смятеннии, иноплеменницы вси, зане дым от севера идет, и несть, иже пребудет.

32 И что отвещают царие языков? яко Господь основа сиона, и тем спасутся смиреннии людий его.

Глава 15

1 Нощию погибнет моавитска земля, нощию бо погибнет стена моавитская.

2 Плачитеся о себе, погибнет бо и дивон, идеже требище ваше: тамо взыдете плакатися над нававом моавитским. Плачитеся, на всяцей главе плешь, вся мышцы обсечены,

3 на стогнах его препояшитеся во вретища, и восплачитеся на храминах его и на улицах его и на стогнах его, вси возрыдайте с плачем.

4 Яко возопи есевон и елеала, даже до иассы услышася глас их: сего ради чресла моавитиды вопиют, душа ея увесть.

5 Сердце моавитиды вопиет в ней даже до сигора: юница бо есть трилетна. В возшествии же луифа к тебе плачущеся взыдут путем арониимлим: вопиет сотрение и трус.

6 Вода немримля пуста будет, и трава ея оскудеет: травы бо зелены не будет.

7 Еда и сице спасется? наведу бо на дебрь аравлян, и возмут ю:

8 прейде бо вопль предел земли моавитския до агаллима, и плачь ея даже до кладязя елимля.

9 Вода бо димоня наполнится крове: наведу бо на димона аравляны, и возму семя моавле и ариилево и останок адаминь.

Глава 16

1 Послю аки гады на землю: еда камень и пуст есть гора дщере сиони?

2 Будеши бо аки птицы парящия птенец отятый, дщи моавля, потом же арнон множайше совещавай.

3 Сотворите покров плача ея присно: в полуденней тме бегут, ужаснушася: да не отведешися,

4 обитати будут в тебе беглецы моавли: будут в покровение вам от лица гонящаго, яко отяся помощь твоя, и князь погибе попираяй от земли.

5 И исправится с милостию престол, и сядет на нем со истиною во скинии давидове, судя и взыская суд и ускоряя правду.

6 Слышахом укоризну моавлю, укоритель (бысть) зело, гордыню отях: не тако волхвование твое, не тако.

7 Восплачется моав, в моавитиде бо вси восплачутся: живущым же в сефе помышления, и не усрамишися.

8 Поля есевоня возрыдают, виноград севамань: пожирающии языков, поперите винограды его, даже до иазира: не совокупитеся, обходите пустыню, посланнии осташася, проидоша бо море.

9 Сего ради восплачуся яко плачем иазировым о винограде севамани: древа твоя посече есевон и елиала, яко на жатву твою и на оымание вина поперу, и вся падутся.

10 И отимется радость и веселие от виноградов, и в виноградех твоих не возрадуются, и не изгнетут вина в точилех, престало бо есть:

11 сего ради чрево мое на моава аки гусли возгласит, и внутренняя моя аки стену обновил еси.

12 И будет в посрамление тебе, и яко утрудися моав о требищих, и внидет в рукотворенная своя, да помолится, и не возмогут избавити его.

13 Сие слово еже глагола Господь на моава, егда возглагола.

14 И ныне глаголю: в триех летех лет наемника обезчестится слава моавля во всем богатстве мнозе, и оставится умален и нечестен.

Глава 17

1 Се, дамаск возмется от градов и будет в падение.

2 Оставлен в век, в ложе стадам и в покой, и не будет отгоняяй.

3 И ксему не будет укреплен, еже вбегнути тамо ефрему: и ксему не будет царство в дамасце, и останок сирян погибнет: неси бо ты лучший от сынов израилевых и славы их: сия глаголет Господь саваоф.

4 Будет в той день помрачение славы иаковли, и тучная славы его потрясутся.

5 И будет, якоже аще кто собирает жатву стоящую, и семя класов пожинает: и будет, якоже аще кто собирает класы в дебри тверде.

6 И останется в ней стеблие, или аки зерна маслична две или три на версе высоце, или четыре или пять на ветвии ея останут: сия глаголет Господь Бог израилев.

7 В той день уповая будет человек на сотворшаго и, и очи его ко святому израилеву воззрят,

8 и не будут уповающе на требища, ниже на дела рук своих, яже сотвориша персты их, и не будут смотрити на дубравы, ниже на мерзости их.

9 В той день будут гради твои оставлени, якоже оставиша аморрее и евее от лица сынов израилевых: и будут пусти,

10 зане оставил еси Бога спаса твоего и Господа помощника твоего не помянул еси: сего ради насадиши сад неверен и семя неверно.

11 В оньже бо день аще насадиши, прельстишися: а еже аще заутра посееши, то процветет на жатву, во оньже день наследиши, и аки отец человечь наследие даси сыном твоим.