Shakespeare's Sonnets in Romani

Татэ кхамэса традыны,

Латэ якхэндыр криг нашлы,

Сыр тэлэ пхув сыс чюрдыны:

«Мэ надыкхав!..» — холяса ёй, –

«…на тут,» — тэ ман зракхья одой!

Сонэто 146

Чёроро ди, кай грэхи мрэ дживэн,

Тырдэна тут про дром о хохано:

Соб тэ чялякирэс бокхалыпэн,

Соб тэ макхэс куч, со дурал дыкхно.

Палсо ваврэскро кхэр дро кучипэн

Ту рикирэса пал ловэ барэ?

Коли кирмэ ивья саро залэн,

Чюрдэн пирэ балвал бутя тырэ.

Джив пр адава, со кэрна бутджинэ,

Тхов кхэтанэ саро дро миштыпэн,

Кин шэлбэрша пал дывэса кирнэ,

Яв пфуй — яврял, андрэ — дро чялыпэн.

Чёр мэрибнастыр, манушэндыр — ёв,

Мэрэла мэрибэн, ту на хасёв!

Сонэто 147

Камам, сом дрэ здраны, дава родав,

Со састякирла мро насвалыпэн,

Дукх закэдэла, дэла со тэ хав,

Соб забистравас мро бокхалыпэн.

Мэк тэ састякирэл ман мри годы! –

Холясыя, со ла мэ на кандава,

Гэя аври, годы сы нашады,

Сыр тэ мэрав, кана дужакирава.

Гэя годы, кэрдя вастэса: «Яв!»

Мэ, бигодякиро, кана на кхинёвава,

Традава дылныпэн лав пало лав,

Про чячипэн чибаса попэрава.

Совлахадём: ёй сы жужы, шукар,

Нэ сыр э рат — калы, пфуй — сыр э дар.

Сонэто 148

Палсо якха, дыкхи начячюнэс,

Дро мро ило мэклэ о камлыпэн?

Палсо мири годы, ило миштэс

На лэнас лэс аври тэ вытрадэн?

Коли дава шукар ваш мрэ якха,

Палсо кошэла свэтыцо саро?

Екх дош тыкны, ками, мэ на латхав,

Кай бут локхэс латхэла годьваро.

Нашты, соб ман якха тэ хохавэн,

Ками, ёнэ сы парудэ ясвэнца,

Сы ґалыно, палсо пхарэс дыкхэн,

Сыр кхам, коли сы закэрдо тученца.

О камлыпэн, фрэнтари адава,

О грэхи гаравэна дрэ ясва.

Сонэто 149

Пхэн, холямы, хай, на камам мэ тут,

Коли мэ кокорэс пэс хаськирава.

Пал тутэ, пхэн, на думинава бут,

Коли мэ пэс ваш тукэ забистрава.

Мро врого, сыр конэс ту на камэс,

Кон на пиро ило, лэс надыкхав,

Коли ту ман костян начячюнэс,

Мэ радо сомас пэс тэ умарав.

Сави бари патыв латхава мэ,

Соб тэ на тэрдёвав кэ ту сыр робо?

Коли камам адякэ, хасимэ,

Тырэ кирнэ якха кандавас собы!

Дрэ три холы кэ мэ сы екхоро:

Камэс, соб тэ дыкхэн, мэ — короро.

Сонэто 150

Катхыр, мри бизорьякири, да зор,

Соб дро миро ило тэ раинэс?

Соб тэ патяв, мэк хохавэса, хор,

Тэ совлахав, хай, сы кало — дывэс.

Сыр парувэса ту саро кирнэс?

Зор биладжякири тыри катхыр,

Со дрэ мири годы ту сыкавэс

О кучипэн сарэндыр гожэдыр?

Кон тут сыклякирдя, соб тэ барьёл

Ваш тукэ мрэ холяса камлыпэн?

Сарэ ракирна, хай, ничи на мол,

Ками мангава, на шун ту ваврэн.

Сыр да барьякирэл тро кирныпэн,

Бутыр сарэндыр мол мро камлыпэн.

Сонэто 151

О камлыпэн — тэрно, соб тэ ґалёл

Э ладж, мэк сы, ґалёв, чяй лэскири.

Мирэ доша (ман тэ кошэс на мол) -

Шукарипэн тыро, мри гудлори.

Ту хохавэсас, тэ адякэ ж мэ

Мро ди мирэ масэса хохававас,

Мас хохадя оди нахасимэ,

Тэ мэ дрэ дылынэндэ ачявавас.

Шунав тро лав, ґаздэлпэ ладж мири,

Тэрды учес, прэ тутэ сыкавэла,

Сыс пхутькирды пашэ раны бари,

Тэ традыны аври — тэлэ пэрэла.

Кон сыс дро камлыпэн тэлал-упрал,

Ёв ґалыя миштэс, сыр ладж тэ хал.

Сонэто 152

Ками тут, сом банго, чячес кошэса, –

Дуй молы сан банги пир совэля:

Ромэс, сыр ман, камлэс, ту хохавэса,

Ту дуй илэ чюрдэса дрэ мэля.

Сыр пал дуй совэля тут бишарава,

Коли аж дэшудуй мэ пхагирдём?

Ками тут, тэ патяв бутыр на лава

Др одо саро, палсо тут покамьём.

Хай, сан лачи, совлахадём бут молы,

Нэ камлыпэн, патыв, патяибэн

Соб тутэ тэ дыкхав, ило корьёла,

Якха локхэс латхэна, со камэн.

Камьём, — хай, сан жужы, совлахадём.

Ада начячюны совэл хаём.

Сонэто 153

О Купидоно тэ совэл пэя,

Диана бичядя нимфа кэ ёв;

Ёй почёрьял яг камады лэя,

Яндя ко шалало паны — тэ тхов!

Тэ акана тато камаибэн

Татькирла о паны, со кэрадёла;

Бут мануша пирдал насвалыпэн

Одой: панестыр кажно высастёла.

О Купидоно пэскэ яг нэви

Мирэ камлятэ дрэ якха лэя,

Дро мро колын о камлыпэн чюви,

Ёв зумадя, мишто ли хачия.

Др одо паны ивья пэс тэ ракхав:

Ман састякирна лакирэ якха.

Сонэто 154

Лыя Амуро тэ совэл, чюдя

Яг камады паш пэстэ; э вэшытко

Ваш кхэлыбэн пхэненца ла чёрдя

Тэ лыджия одоя яг бидытко,

(Яг шэл шэла илэ захачкирдя).

Дро чякиро рикири васторо,

Ёй ла дрэ шылалы ґанынг тходя,

Жыкай исыс суто о дэвлоро.

Сы о паны ягаса хачкирдо

Тэ састякирла ёв дукх камады

Бутэнгэ, мангэ сыс фэдыр кэрдо,

Коли ман дохая екх пхутькирды.

Яг камады паны ростатькирдя,

Нэ о паны э яг на хаськирдя.

Перевод выполнен в июле-августе 2004 (Москва — Албена), 7 и 66 — несколько лет назад, примерно в 1995