Аскетика. Том I

Вопрос 662. Добре ли убо творяше старец, не исправляя брата своего?

Ответ. Брате, не якоже прилучися, остави старец не поучати его, но многажды его поучаше, тойже не приемляше поучения. И зря его неисправлена, остави вещь на суд Божий, глаголя: Бог весть полезное; брат бо лучший мене есть. Сие же творяху совершеннии, не смеюще судити никогоже, на посрамление ничтоже сущих, а всех осуждающих.

Вопрос 663. Егда согрешает раб мой и хощу его наказати, киим образом сие сотворю?

Ответ. Образом любве яже по Богу, да наказанием исправився, престанет согрешати, и будет ему на спасение души. Не подобает же ти со гневом сие творити: от зла бо добро не раждается. Но аще помысл твой смутится, пожди его, дондеже без смущения будет: и тако со благосердием и страхом Божиим накажи его.

Вопрос 664. Но егда хощу наказати его, глаголет ми помысл: яко горше согрешаеши, и како того накажеши, себе самаго не исправляя? И пресецает мя от наказания.

Ответ. Сей помысл от диавола есть, да оный пребудет неисправлен, а ты воздаси слово о нем. Но рцы помыслу тому: яко убо множае согрешаю, явно и известно есть; но не могу слово воздати и за себе, и за него: от мене бо Бог взыщет исправления его. И, по еже наказати его со щадением и со страхом Божиим, рцы сам себе слово апостольское: «научая иного, себе ли не учиши?» (Рим. 2, 21). И тако обретешися со смиренномудрием исправляя его.

Вопрос 665. Аще увижду кого досаждающа чествованию, или хуляща святую веру, аки по ревности, смущаюся на него. Что есть сие?

Ответ. Слышал еси всяко, яко не бывает исправление чрез зло, но паче чрез благое. С кротостию убо и долготерпением возглаголи, досаждающаго научая со страхом Божиим. Аще ли же видиши себе смущающася, то ничтоже подобает рещи.

Вопрос 666. Случается, яко сретаю некоего, и страстне ему внемлю, и уязвляюся душею: и аще будет нужда побеседовати с ним, не могу воззрети нань. И от сего иногда подаю ему помысл, яко презорник. И толико случается мне сие, яко смежати очи, не терпящу зрения. И скорблю, не ведый, что сотворю. Но помолися о мне, Владыко, и поcли ми слово жизни, и врачевства человеколюбия твоего.

Ответ. Понеже вопроси любы твоя о еже страстне взирати на предстоящаго, и есть сие проявленно от браней диавола: веждь, яко и умом внимати от того есть. Поминати убо должен еси нетление и смрад естества нашего; како входяще во гробы будем. Что же о тленных сих привожду тебе слово? И не помышляеши ли паче положити пред очесы будущий Страшный cуд Божий быти? И где обрящется наследие деющих сия? И како возможеши понести великий оный студ явления деяний наших пред Ангелы и Архангелы, и всеми человеки, пред Праведным Судиею? И како заградятся уста делателей деяний сих? Да убоимся убо Глаголющаго: «не льстите себе: яко ни блудницы, ни прелюбодеи, ни малакии, ни мужеложницы, Царствия Божия не наследят» (1 Кор. 6, 9—10), и: «всяк воззревый на жену, ко еже вожделети», и прочая, и: «аще око твое соблазняет тя, изми е» (Мф. 5, 28–29). И сия убо должен еси поминати, не учащати же к человеком, к нимже обретаешися имея брань сию. И паки да не явиши им, чесо ради удаляешися от них, да не како и в помыслы ввержеши их, но аще нужда будет беседовати с ними, призови святое имя Божие в помощь, глаголя: Владыко Иисусе, покрый мя и помози немощи моей. И дерзай, яко сокрушит лук врагов: во имени бо Его есть недейство зол. И, вместо многих, глаголи мала: и да не пустиши им слуха и помыслов; но спрятай себе честно и несмущенно, ко еже ни единому же познати бываемаго. Аще ли же и силу приимеши от сих, да не посмееши на враги твоя: безстудни бо суть, и тмами аще побеждени будут, то противу подвизаются паки. Но победоносный Бог, Той есть помогаяй смирению человека, его же ради хотяй воплотися.

Вопрос 667. Что есть реченное, яко — блюди, да не восхитит тя помысл блудный?

Ответ. Сия вещь не в блуде случается точию, но и в других вещах. Сие же страждет ум от парения. И должен кто воззвати самаго себе, глаголя: Господи, прости мя, имене ради Твоего святаго, яко от моего нерадения постиже мя сие. Избави мя от парения и всякия сети вражия, яко Твоя есть слава вовеки. Аминь. Явление же восхищения да будет тебе сие. Аще беседует кто, а ум свой имать в парении, случается, яко о ином беседующу ему, восхищается ум его во ино, и се есть восхищение. И егда делает кто, аще воспарит умом от дела того, то обретается по забвению или потребляя дело тое, или излишно творя нечто от подобающаго: и сие паки восхищение есть. Тойжде образ и о помысле блуда есть. Случается бо, яко беседует кто с некиим, аще постигнет враг отвлещи ум от трезвения Божия, то обретает от парения в себе и похотение блуда, и сие восхищение есть. Не бо по предпоучению, или по воспоминанию бысть, но по забвению совосхитися. И таковый подобен есть человеку путешествующу, иже от некия случившияся ему туги, оставит правый путь свой и на ином обретается. Но подобает истрезвившуся воззвати себе по реченным и притещи к милости Божией: благоутробен бо есть, и приимет его, яко блуднаго онаго сына. Не не вемы бо, како благосердно приял есть. Егда же, и кроме парения, насеется сия брань в помысл, подобает трезвитися, и не усладитися и закоснети в нем, но скорее прибегнути ко Владыце Богу.

Вопрос 668. Аще ищет потреба побеседовати мне с женою, что сотворю? Или како употреблю беседы? Рцы ми, подобает ли виною благочестия или сострадания влагати себе в дело их?

Ответ. По всякому убо образу обретаем, яко не разумевающих в делах Божиих вредит беседа жен. Елико убо возможно, удаляйся, и да не вложиши себе в беседу жен; не пользует бо тя сие, аще и добры нравом суть. Но понеже мира не избыхом, и зовет нас иногда нужда в беседу сих о совещании, или о коей-либо вещи: да предустроим во уме образец сей: яко-же человек, приступаяй ко огню, сотворит своя потребы, внимает крепко, да не ожжется огнем тем, — тако и мы во всех делах к ним употребляем, аки ко огню приступающе, и да утвердим себе всяким образом во страсе Божии, да не когда аки непщующим нам от них прияти пользу, обрящется наша мнимая польза, тщета велия. Аще ли же отнюд Бога ради восхощем прейти, то чрез иное лице да сотворим сие, аще возможно есть. И ниже восприимем, якоже прилучися, взирати противу им, ниже зрения на ня да отрешим, ниже да закосним в беседе их. От сего бо рождается огнь похотения, но да потщимся вскоре избавитися от них, моляще Бога, да спасет нас в час оный нужный от сети диаволи, простертыя пред нами, и непрестанно да поминаем Его. Ибо сила Его велика есть покрыти немощь нашу, о Христе Иисусе, Господе нашем, Емуже слава вовеки. Аминь.

Вопрос 669. Ин христолюбец вопроси великаго старца: полезно ли ему оставити жену свою, с намерением еже иночествовати?

Ответ. Чадо, да не будет оставление ея от тебе. Понеже преступиши заповедь апостола, глаголющаго: «привязался ли еси жене, не ищи разрешения» (1 Кор. 7, 27). Зане, аще согрешит и пойдет зле, на тебе взыдет грех: аще не по согласию, с советом, пользы ради. Но остави вещь на Бога, и якоже хощет, сотворит человеколюбие Его.

Вопрос 670. Ин христолюбец вопроси тогожде великаго старца, глаголя: что сотворю, яко скоро впадаю в страсти?

Ответ. Да не положиши с ними завета, и отврати очи твои, еже не видети суеты, и руце твои от лихоимания, и избавит тя Бог от них. Честно убо пребывай, и да не приимеши пищи ниже пития в сытость, и смирятся от тебе страсти оны, и обрящеши покой.

Вопрос 671. Ин христолюбец, учитель премудрости мирския, вопроси тогожде великаго старца: аще будет благополучен, преходя в светлейшее достоинство? Великий же рече:

Ответ. Да не высокомудрствуеши, и обрящеши благодать у Бога, и у человек, и довольство велие, идеже аще ни будеши.

Вопрос 672. Тойжде вопроси инаго старца. О томжде.

Ответ Иоанна. Ныне смиренная мира сего избра Бог. Имей смирение, и поможет ти Бог вскоре.

Вопрос 673. Тойжде моли тогожде старца Иоанна, да помолится о беснующемся некоем.

Ответ. Да постится и сам, елико может, то услышани будут и молящиися зань. Многа бо может молитва праведнаго поспешествуема. И Господь рече: род сей не исходит, токмо постами и молитвами.

Вопрос 674. Ин христолюбец вопроси великаго старца, глаголя: понеже разбойницы внидоша в дом мой, грех ради моих, и ничтоже из дому моего взяша: убо востану ли на них (злословя) или юрод сотворюся?

Ответ. Аще всяко имамы, яко грех ради наших внидоша разбойницы, Бог же Своим человеколюбием не попусти злу быти, то по коему образу хощем сами себе отмстити, а не оставити вся Богови, глаголющу: «Мне отмщение, Аз воздам» (Рим. 12, 19). Аще боимся Бога, то егда видим их страждущих нечто, по силе нашей помощи им должни есмы. Но понеже в сие не доспехом, да не когда и хотяще помощи им впадем в тщеславие, то ни зла, ни добра им да не творим, но возблагодарим, не по грехом нашим Сотворшему с нами.