Аскетика. Том I

Вопрос 690. Что убо, аще не приимут мя отнюд, и буду утружден от путнаго шествия и требуяй пищи?

Ответ. Воспомяни, кто пекийся о всех, и всех питаяй, яко Бог есть. Аще убо бы хотел Бог напитатися тебе, то подал бы им извещение прияти тя: не приемшим же им, яве есть, яко Бог не хощет, и не суть они повинни. Вся бо бывают во искус и спасение человеку, яко да претерпит и укорит себе во всех, яко недостойна.

Вопрос 691. Ин христолюбец вопроси тогожде старца Иоанна: помысл влагает мне боязнь, яко может диавол сотворити тя согрешити, аще ты и не хощеши; повинен бо ему сотворился, и зело скорблю от сего.

Ответ. О диаволе не думай, яко власть имать на кого: зане вина греха по произволению нашему обретается, а не по принуждению приемшаго власть: якоже убо не имать человек принуждения на спасение, тако ниже на грех. По власти ли прельсти Еву, или по совещанию? Нигде же видится власть. Понеже никтоже смеяше бежати от имущаго власть. Мы убо таковии есмы, якоже человек свободен поработився кому своим произволением, иже временем приходит в себе и кается. И аще не прибегнет к сильнейшему паче его, то не может кто себе избавити. Аще ли же прибегнет, прочее он ведый, яко несть его раб собственный, не смеет что сотворити ему, Крепльшаго ради его. Темже яве есть, яко власти над человеком не имать. И ты убо рцы помыслу тому: яко убо должник есмь, но прибегох к Могущему избавити, и Призвавшему мя, и Глаголющу: приидите ко Мне труждающиися и обремененнии, и Аз упокою вы. И должен есмь всегда бодрствовати, да не паки впаду в руце его. Аще ли же паки речет помысл, и понеже не может тебе принудити согрешити, се безгрешен обретаешися, и отягощает тя от сего помысла, рцы ему: аще речеши мне, ктому не согрешаю, не верую тебе, аще не достигну града (небеснаго). Аще бо кто совершит путь весь, и имать еще едино поприще, и тамо возляжет, то ничтоже пользова: вне бо есть града. Пред Богом убо повержем неможение наше, и Той ти упразднит козни, молитвами всех святых Своих. Аминь.

Вопрос 692. Понеже нивы мои прузи вредят, и аще иждену, окрестнии сварятся с нами: и аще оставлю, потерплю вред. Что сотворю?

Ответ. Возми воду освященную и покропи на нивах твоих. И аще с миром и без свары возможеши отгнати, или закопати, несть ти грех. Аще ли же свара будет, на пользу души твоея остави вещь Богов, и еже будет, волею Божиею будет.

Вопрос 693. Что убо, владыко? Аще всяко восхощем отгнати гнев Божий, не раздражим ли сим Бога?

Ответ. Совершеннии убо не отгоняют его: имут бо всю надежду свою на Бога. Но мы, понеже плотстии есмы и требуем земных вещей; осуждающе себе самех, яко согрешающих в сем, да отженем с молитвою и псалмопением, молящеся Богови, да простит нам, и тщащеся прочее благодарити Ему. Аще бо и сие прейдет, горшая сего нанесут нам греси. И невозможно, без покаяния и милостыни, престати от нас злым; глаголет бо: блажени милостивии, яко тии помиловани будут. И да не речеши, и чесого ради в наказание наше нанося Бог гнев, терпит не кающихся, и отгоняющих его? Бог бо по прещению наносит гнев, да покаемся. И терпит нас отгоняющих (его), чая долготерпением Своим обращения нашего к Нему. Аще бо пребудем в техжде, то, и по еже изгнати, в горшая злая впадем. И исполнится на нас пророческое слово: «врачевахом Вавилона, и не исцеле» (Иер. 51, 9). И несть инаго чаяти, точию муки вечныя, и тмы кромешния, и червия не усыпаемаго, и скрежета зубов.

Вопрос 694. Понеже вино, еже хощу истоптати в моем точиле, жидовско есть: убо не грех ли есть?

Ответ. Аще, егда дождит Бог, на ниву твою дождит, а оставляет жидовскую, то ниже ты истопчи вино тем. Аще же человеколюбец есть ко всем, и дождит на праведныя и неправедныя, почто ты хощеши быти безчеловечен, а не паче щедр, якоже Сам глаголет: будите милосерди, якоже Отец ваш Небесный?

Вопрос 695. Аще кто вверит мне слово некое, завещав никомуже рещи; а другий заклинает мя исповедати ему: что сотворю? Аще бо реку, опечалю уверившаго мне; аще же не реку, оскорблю вопросившаго мя; и паки боюся клятвы.

Ответ. Заклинаяй тя (рещи), той понесет грех. Не подобает бо, вины ради клятвенныя, явити тайну братнюю. Рцы же ему: аще бы ты вверил еси мне слово, было ли бы тебе приятно, да изъявлю тое иному? Аще убо тебе не было бы приятно, то ниже да просиши мя рещи тебе слово братнее. Речено бо есть: еже ненавидиши быти тебе, да не сотвориши ближнему твоему. И паки: еже аще хощете, да творят вам человецы, и вы творите им такожде.

Вопрос 696. Како должен есмь в залозе имети: яко всяк человек праведен, или яко всех человек аз грешнейший есмь? Сумневается бо помысл имети всякаго человека праведна.

Ответ. Имей себе грешнейша и последнейша всех, и имети будеши покой.

Вопрос 697. Егда беседую кому о житии святых отец и о ответех их, велемудрствует сердце мое. Рцы убо мне: како со смиренномудрием беседовати имам? И кому должно глаголати сия? И каким намерением.

Ответ. Егда беседуеши о житии святых отец и о ответех их, должен еси себе осуждати, глаголя: увы мне, како глаголю добродетели отец, и ничтоже стяжах от них, ниже приидох во успеяние? И сижу, глаголя инем, да пользуются? Да не когда на мне исполнится реченное от апостола: научая инаго, себе ли не учиши? И егда сия глаголеши, сгорати будет сердце твое, и обрящешися глаголяй со смирением. Должен же еси внимати, кому глаголеши. Аще веси, яко имать спользоватися, тогда побеседуй. Аще ли же ни, несть потреба беседы. Писано бо есть: блажен глаголяй во уши слышащих. Да не когда обрящешися, подаваяй святая псом и повергаяй бисер пред свиниями. Господь да вразумит тя, брате, еже бы не заблудити от пути смирения.

Вопрос 698. Два христолюбца беста, искренно любяща друг друга о Господе, и от отец в жизни наставляема. От сих един, в собеседовании, рече слово о ином некоем. Другий же, по совосхищению диаволю, помыслив, яко к нему рече, смятеся зело. И оному известна его творящу о сем, не приимаше. И отсюду бывшу между ними малу прекословию приидоста оба ко отцем и явиша томужде старцу дело то.

Ответ. Яко единодушным глаголю вам всю истину пред Богом. Оба должни есте принести покаяние Богу, не леностно, но от всего сердца, да простит вам молитвами святых отец ваших. Ты убо, яко оклеветан быв, не понесл еси поречения онаго, глаголя: яко аз согреших, и весь грех есмь, яко мене ради смятеся брат мой. Сей же, яко не разсуди прежде, неже возглаголати слово оно, яко не к нему речено, и яко ничтоже противно не имел еси рещи до смерти, но и той, якоже ты, обретеся не имый терпения. Обаче вы не имате вещи, но мы есмы виновни злых, яко молитв не имамы. Аще бы быхом имели, покровени быти имели бысте от лукаваго, сеющаго посреде вас плевелы во еже искусити вас. О сем бо молимся, еже вам покровенным быти. Не боитеся ли суда Божия, да не соблазнятся о вас человецы, глаголюще: се чада отцев, како не имут терпения, но друг на друга находят? Аще убо вы стыдитеся друг другу положити метание от сердца, мы положим за вас: нам бо подобает таковый студ. Господь да простит вам, и да сохранит вас от лукаваго, и да сокрушит его под ноги ваша вскоре. Единодушии будите о Господе, и единомысленни, и единоверии. Господь да утвердит вас непоколебимых во страсе Своем. Аминь.

Вопрос 699. Ин христолюбец, странноприемлющ отцы, посла писанием, вопрошая тогожде старца: полезно ли ему отврещися совершенно мира и приити во иноческое житие? И егда отписа ему старец, яко совершеннейшо есть отшествие, возмнев, яко по заповеди ему слово речено бысть, оскорбе зело, и помысли ктому не вопрошати отцев ни о чемже. Сие разумев старец духом, рече написати ему сия:

Ответ. Прежде всех целуем о Господе любовь твою, и просим тя всякий помысл печален отложити, и со радостию и страхом Божиим прочести и выразумити преднаписанная тебе в первом послании. Ниже бо по заповеди написахом вам что, навыкше от апостола, глаголющаго: не да сило вам наложу, но разсуждающе в вас едино коеждо дело, кое имать пользы различие, якоже вси слышахом Спаса, во Евангелиях глаголюща писанная в законе: еже не прелюбы сотвориши, не убиеши, и прочая.

Вопросившему Его же рекшу: вся сия сохраних, что есмь еще не докончал? Глагола ему о совершенстве: аще хощеши совершен быти, продаждь имение твое, и прочая, яже веси. Но доброненавистник присно обходит, запиная всякому делу благу. Ведя бо написанную вам пользу, и прежде неже уразумети вам силу написанных, вмале не смути помысла вашего. И удивитися мощно, како покрывает ум человека, восхищая помысл его, якоже бы совершенно не спользоватися ему: и не оставляет его вопросити себе, чесого ради смущается, и рещи себе: «вскую прискорбна еси душе моя; и вскую смущаеши мя; уповай на Бога, яко исповемся Ему» (Пс. 41, 6) и прочая. Сия же творит, во еже показати человеку, яко аще бы от святых быша написанная, то помощь подавали быша, а не смущение и искушение. Но трезвенный во ум приводит и апостолов, неверствием смутившихся, егда увидеша Владыку своего и Спаса Христа; назнамена бо им, глаголя: «что смущени есте; и почто помышления входят в сердца ваша» (Лк. 24, 38)? И абие последова словесем Его тишина. Тако и мы, аще в безмолвии сердца прочтем написанная, и обрящем, яко не достизаем сотворити, по писанному, на сто, и на шестдесят: аще не тако, то поне третие, (сиречь) на тридесять. Да разумеем же, яко во всех полезна быша нам написанная, аще и не достизаем сотворити совершенное, наказуемся в предлежащем странноприимства деле, якоже не высокомудрствовати, яко велие нечто творим, обретающе, яко совершенства недостигохом сотворити. Не тако отметающе бываемая ныне от вас, написахом вам содержащаяся в первшем послании, но да в большее приидете, или пребывающе, в нихже есте, смиренным помыслом устрояете дело тое. Да не чудитеся же о искушениих: заповедь бо имамы, яко «радуйтеся, егда во искушения впадаете различна» (Иак. 1, 2). Вопрошен же бысть иногда некий от святых отец от некоего брата: что есть сие, авво, яко, егда хощу уснути, и труждаюся молитву дея, и знаменуя себе (крестным знамением), в тую нощь искушение блуда стражду во сне; аще же не сотворю молитв, ниже назнаменую, не бывает (ми) искушение? И отвеща ему старец, глаголя: яко по хитрости сие творят бесове, во еже отставити тя от молитвы и знамения крестнаго: ведят бо, яко от сих помощь бывает человеку тому. Тако и ты, аще что вопросиши отцев, и на время смутят тя бесове за словеса их, никогдаже да отступиши от вопрошения их; ничтоже бо вредно или тяжко установляют: ученицы бо суть Рекшаго: «иго Мое благо, и бремя Мое легко есть» (Мф. 11, 30). И послежде обрящем плод пользы их, и тогда возопием со Псалмопевцем, глаголющим: обратил еси плач мой в радость мне, и прочая.

Вопрос 700. Случается, мне беседующу с некиим, внезапу парити умом, якоже мнети и вне себе быти, и предлежащаго забывати слова, не преносящуся уму во ино нечто, но изступающу из себе самаго. Что убо есть сие, отче? И что мне подобает творити? Зело бо скорблю.

Ответ. Сие брань есть диавольска хотящи посрамити человека того пред сущими. Аще же со свободою явиши им вещь ону, глаголя: простите мне, парити сотвори мя диавол; посрамится и престанет брань сия; и прочее с трезвением беседуй. Непщуется же ничтоже быти сие. Не разумевающему же мног стыд творить. Память же имене Божия вся совершенно злая упразднит и укрепит немощь нашу. Аминь.