Вирши

БЛАГОДАРСТВИЕ [456]

2

Благодарствия степень трегуб обретают мудрии, иже тому вся ны научают. Первый того есть степень: благотворение выну знати, не дати его в забвение. Вторый — благодарити и милость хвалити. Третий — воздаяние по силе творити. Неблагодарник убо, иже не воздает, вящший благодетеля кто не ублажает. Величайши, не знаяй данны благодати, не хотяй во памяти ея содержати. Проклятый же есть злобник, иже за благая тщится благодетелем воздаяти злая. Мало менший есть того, благодать гаждаяй, третие имать место в злобу ю вменяяй. Чтый, неблагодарствия всячески блюдися, злободеянию же ни перстом коснися. Но благодарен буди, тако бо ти многа милость от человек будет и от Бога.

4

Благодарствие дары людем умножает, неблагодарствие же и малых лишает.

6

Нива благодарствие учит ны творити, едно зерно обыкше в сто усугубити.

456

Цикл состоит из 7 стихотворений.

БЛАГОДАТЬ ЕСТЬ ЖИВОТ

Рыба воды вне скоро умирает, вне благодати душа исчезает. Прилежим убо в благодати быти, душами жити.

ВО БЛАГОДАТИ ЧЕЛОВЕЧЕСКОЙ НЕ УПОВАТИ

На трости руце свои утвержает, кто в человецех силных уповает. Трость сокрушится, падет утверженный, умрет велможа, он будет прелщенный. Тем же псаломник светло увещает: — Да никто в князех мира уповает [457] . Егда бо душа из княззя изъидет, на помощь к тому никогда приидет. И сам в персть земну будет обращенный, из нея же бе Богом сотворенный. Иеремия [458] того проклинает, кто в человеце тленном уповает, оставив Бога. Се бо грех великий пред лицем святым всех сущих Владыки. Обаче мнози во них уповают, вся в них надежды своя полагают. В то время мнят ся блаженни и святи, егда общницы суть их благодати. Заповедь Бога жива презерают, да их лукавей воли угождают. За слово онех готови умрети, а за божие не мало терпети. Не тщатся Богу тако угодити, яко велможным послугу явити. И аще у них милость обретают, то гордостию сердца исполняют. Суть яко говор на воде надменный, и ходят яко павлин напыщенный. Вящщую себе милость обещают, но окаянне тако ся прелщают, ибо внезапно вящщий гнев бывает, нежели милость, юже отвращает гневный велможа и не хощет знати того, его же име в благодати. Вящщая повем: во врага вменяет и, аще мощен, абие отмщает. Прият искуство Аман горделивый и истинны сея, царю си служивый. Иже всех паче бе превознесенный в чести, в богатствах, тем же и надменный. От всех поклоны и дары имаше, первый по царе во царствии бяше. Иесфир ему почесть сотворила, на пир бо к себе с царем пригласила [459] , Нань же прииде в чести и во славе, не усмотряя бедства своей главе. Мало утехи тамо восприял есть, но суд велия казни услышал есть. Древняя милость на гнев преложися, Аман на древо царем осудися. И тако над вся в чести возвышенный, выше всех злодей бяше повешенный. Зри кождо, како благодать прелщает, никто надежды в ней да полагает. Благо на Бога выну уповати, он косен к казни, скор же миловати.

457

Тем же псаломник светло увещает: — Да никто в князех мира уповает...— вольное истолкование начальных слов первого псалма: «Блажен муж, который не ходит на совет нечестивых и не стоит на пути грешных» (Псалтирь, I, 1).

458

Иеремия — согласно ветхозаветной легенде, пророк Иеремия живым вознесся на небо.

459

Иесфир ему почесть сотворила, на пир бо к себе с царем пригласила...— здесь перефразируется библейский рассказ о иудейской красавице Есфири, ставшей женой царя Артаксеркса. Первый министр царя Аман из зависти решил погубить Мардохея, воспитавшего Есфирь. Тогда она устроила пир, на который пригласила царя и его министра. Возгордившийся Аман приказал слугам строить виселицу высотой в 50 локтей, на которой он собирался повесить Мардохея, но вскоре сам был на ней повешен (Есфирь, V).

БЛАГОУМИЕ

Еже древо благия может плоды дати, безумен, кто в здание тщится посекати. Точне кто благоумна чада обращает в нечестна художества, безумен бывает.

БЛУДА БЕГСТВО

Демосфин [460] ветий на блуд глашен бяше, первее о мзде дела вопрошаше. Егда же реша ему мзду велику, рече: «не хощу на цену толику показания себе куповати, изволнее ми чисту пребывати». Се еллин злата дати не хотяше, а мзды чистоты в небе не чаяше. Ты, христианин, душу отдаеши сатане за блуд, егда нань течеши. Оле срамоты! И то вестно тебе, яко мзда честна за чистоту в небе. Не купуй убо блуда тако драго, мзды чай от Бога жития чистаго.

460

Демосфин — имеется в виду Демосфен, сын Демосфена из Пеанийского дема (385—322 гг. до н. э.), знаменитый афинский оратор и политический деятель.

БЛУДНИЦА [461]

3

Корабль, на мори ветрами гонимый, от рыбы малы бывает держимый, юже «удержку» мощно нарицати, яко есть силна корабль удержати. И в мира мори суть рыбы такия, от течения блага держащыя. Блудницы юных удержки бывают, егда путь благий тещи препинают.

461

Цикл состоит из 3 стихотворений.

БОГАТСТВА [462]

2

Богатства три некия имут вещи в себе, яже не попущают вселитися в небе. Перва, яко богатый тщится то множити несытно, а без греха то не может быти, ибо Господь убогим повеле даяти, а хотяй богат быти хощет везде взяти. Второе, Господь сердец всех себе желает: — сыне, отдажд ми сердце твое,— совещает. Богатии же сердца злату прилагают, а не Богу святому во жилище дают. Наконец, велит Господь не велми пещися, ниже упованием в злате погрестися. А златолюбцы лише потребы пекутся, да к ним прибытки многи отвсюду несутся, и в собрании мнозе много уповают, паче Творца своего ту тварь почитают.

4

Въскую горе богатым правда глаголаше; яко скорби их оком своим созерцаше. Ибо кроме вечных мук в няже вси впадают, иже неправедная богатства держают. И зде многия муки обыкли страдати, их же нищетствующий мужь не может знати. Богатии во мыслех покоя не знают, ядят со боязнию, с страхом почивают. Аще суть и на пирех, не знают радости, но воздыхают, ниже во меде сладости чувствуют. Ни пищею добре утыкают, но от печалей аки гладнии изсыхают. На постелях мягчайших бдят — не могут спати: мысль о богатствах мира не может им дати. Сладще на земли тверде нищий почивает, вкуснее хлеб с водою во сытость снедает: и свободней есть нищий ни чим обвязася, яко оков богатства несть восприял на ся. Богатый же муж златом в уме окованный, честными веригами по сердцу связанный, ни знает того бедный, яко есть плененный злату, а не господин тому сотворенный, яко не держит злата, но златом держится, обаче аки свобод о злате хвалится. А лучша есть свобода кроме злата драга, мысль свободная к Богу в ней есть и преблага.

462

Цикл состоит из 7 стихотворений.

БОГАТСТВА ЧУЖДАЯ

Якоже молния скоро угасает, подобие богатство чуждо изчезает.

БРАНЬ ДУШЫ С ПЛОТЬЮ

Плоть и дух в человеке всяком пребывают, выну же друг на друга бранно наступают. Имут своя воинства в пособие рати, взаим тщатся победу над собою взяти. Плоти похоть, чувствия, страсти помогают, уди вси, мечтания и мысль работают. Дух веру, и надежду, и любовь имеет, и вся добродетели, ими же брань деет На похоти плотския и на оны воя, а различна изводства видим того боя. Но частее победа плоти ся случает, а она пленники си во ад посылает — князю тмы века сего в жестокия руки, не в работу краткую, но на вечны муки. И сама плоть такожде огнь имать страдати, егда ю со душею имать Бог в ад дати. Духови паки едва когда то случится, яко плоть от воинства его победится. Но святая победа онаго бывает, ибо душе победный венец возлагает и Царю небесному к горнему Сиону во чести превелицей посылает ону, не в горце пленении и работе быти, но во сладце пении и свободе жити. Идеже в конце веков и плоть возвращенна душе будет — во радость вечну водворенна. Помози убо, Христе, духу на той брани пособием ти силным, пре ко плоти стани, да духа победою душами спасемся, во царствие небесно в чести воведемся. А плоти не попусти победы стяжати, да никогда торжества сподобится знати. Да раболепна будет си победителю, яви нам милость сию, Христе спасителю. Мы благодарственная хощем нести тебе и на земли живуще, дажд и в светлом небе.

БУДЕТЕ ЯКО БОЗИ

Враг человека в рай лукаво прелщаше: — «будети яко бози»,— Еве глаголаше. Ругася он в то время, но сам есть прелщенный, ибо человек по том Бог есть сотворенный. Не по существу убо, но по благодати, и возможе демона ногами попрати. И тако в нем же хоте род наш посрамити, тем же делом заслужи сам посмеян быти.

БЕГАТИ ЗЛЫХ

Слон козла смрада ради прескоро гонзает — муж благий злонравнаго тако да бегает.

ВЕСЕЛИЕ МИРА ЕСТЬ СУЕТА

Церковник мудрый егда царствоваше, во всяких вещех богат зело бяше. Сам он глаголет: «сотворих ограды и винограды; насадих древо плода всероднаго, вкусу гортани зело угоднаго; купели создах, мнози раби быша, иже служиша; скоты и стада стяжах пребогата, множество сребра и доволство злата, имений много. Собрах сладкопевцы и виночерпцы. Стяжах премудрость, имех вся велия, не браних сердцу всяка веселия, и очи мои что-либо хотеша — свободно зреша». Но по сих, зрите, что он же вещает: вся та суету светло нарицает. И не без правды, скоро бо преходят, а грех много родят. Долго ли вино гортань услаждает, а коль бед много лютых содевает, свар и убийство от того исходит, что болезнь родит. Кая есть радость лики составляти, аки без ума скакати, плясати; безчинно действо верным непотребно, душам бо вредно. Что о богатстве? Кая полза с него? Выну печалит державца своего, а не искусна душу погубляет, во ад вселяет. Что честь велия может ползовати? Скорби печали весть та умножати, отъемлет покой, а уж надымает, гордость раждает. Не могут долго веселитисия, да ищет кождо радости иныя, яже духовне ум возвеселяет, вечно бывает.

ВИНА

Един от многих, закон кто пренебрегает, всех законов дателя люте оскорбляет. Тако в едином винный, всех винен судится и по вине праведно судящим казнится.

ВИНО [463]

3

Андрокид [464] кровь землену вино нарицает, ин же мудрец кровь нищих оно прозывает, убо кровь нищих тии люде испивают, иже в мнозе пианстве век свой провождают.

4

Излишняя светлость очы помрачает — излишество вина здравие вреждает.

463

Цикл состоит из 7 стихотворений.

464

Андрокид — афинский оратор (V в. до н. э.).

ВЛАСТЬ

Всякая власть от Бога, он бо благи дает властелины. А злыя за грех попущает. Весма убо должно есть власти почитати и в благих велениих им не пререкати. Противник бо сый власти Богу ся противит, за что Господь отмститель, иже благих живит.

ВОЗДАЯНИЕ ЗЛОЕ

Василий святый [465] хотя честь воздати Иулиану [466] , умысли послати хлебы ячменны три, яже имяше и сам во пищу плоти приимаше. Посла усердно, чая благодати, но злый отступник зле тщася воздати, посла бо за то Василию сена, рек: «Се за ячмень буди ти премена: скотску ты пищу ячмень дал нам еси, скотску и от нас сено в мзду отнеси». Святый же отец сице отвещаше: «Что сами ямы, то бысть тебе наше приношение. Ты же воздаеши весма снедь скотску, из нас ся смееши», Подобие мир сей обыче творити, за дары честны худыми дарити. Кто ему службу и дружбу являет, многожды вражду во мзду познавает или тленныя вещи, точны сену, миролюбивым дает во замену. Не тако Господь-Бог нам содевает: за дары худы благия воздает. За временныя — вечныя на небе, убо даяти дары ему требе. Не хощет он их, но нам есть полезна, сице бо стяжем царствие небесно. Не хощет даров Бог,— но воли благи, та с чистым сердцем дар ему предрагий. Тем же две цате [467] нищыя вдовицы Христос приял есть над многи златницы: усердство ея изволили прияти, паче богатых ей похвалу дати.

465

Василий святый...— Василий Великий (ок. 329—379), ранневизантийский церковный деятель, мыслитель и писатель.

466

Иулиан — очевидно, Юлиан Отступник — с 361 по 363 г. византийский император и философ, пытавшийся возродить язычество.

467

Тем же две цате...— цата — небольшая серебряная монета, имевшая хождение в Древней Руси. Здесь вспоминается эпизод из Евангелия, смысл которого заключается в том, что истинную ценность имеет не то, что дорого и много, а то, что идет от сердца (Марк, XII, 41—44).

ВОЗДЕРЖАНИЕ

3

Воздержание от брашн малу ползу деет, аще друга своего снедати кто смеет.

9

Аще не тщится игрец натягати струны во гуслех, та не может дати сладкаго гласа: тако силы тела невоздержанна не дают весело Богови гласа, убо сохраните воздержание: тем Богу служите.