Аскетика. Том I

Вопрос 139, тогожде к томужде.

Понеже егда даю телу моему и паче потребы, не довлеет на службу, и паки меньше дати ему боюся, яко да не совершенне отпадет: что должен есмь сотворити о сем? И о святом причащении: понеже на всяк день хощу причащатися, тяжесть ли ми будет, аще взыдет ко мне грешному святое причащение или должен есмь аз низходити, и причащатися? И како паки сохраню безмолвие.

Ответ. Предрех любви твоей, авво, словеса Иоаннова ко Спасу. И паки приложил еси писати ми безумному и невежде! Обаче аще Иоанн послежде не сопротив глагола, аз кто есмь уничиженный, еже сопротив глаголати? Глаголю убо ти самую истину, яко ничтоже есмь, и ничтоже свем. Но послушания ради, аще что имам в сердце моем, глаголю. Не глаголю же, яко всячески тако есть; но якоже ямам, глаголю. Не истяжет Бог от болящаго службы телесныя, но духовныя, си есть молитвы; глаголет бо «непрестанно молитеся» (1 Сол. 5, 18). О пище же тела, или егда приимет довольную пищу, не может послужити; аще ли же паки не приимет, боимся немощи, то держи среднее: ниже горе горе, ниже доле доле. И исполнится Писание глаголющее: «не уклонися ни на десно, ни на шуе» (Притч. 4, 27). Но даждь телу потребу его без мала. Сей бо есть путь отеческий, еже не упиватися, ниже отягчатися в жительстве своем. И о еже приходити Святому Причащению: егда не по презрению бывает, но по немощи, то несть осуждение. Ибо старейшина врачев ко весьма страждущим и болящим сам собою приходит: якоже уже к нам грешным и болящим, от Себе прииде Господь наш Иисус Христос. Прости, отче, яко с послушания глаголах недостойный.

Вопрос 140, тогожде к томужде. Вдова обидима посла ко мне молящи, яко да напишу ко князю, еже помощи ей.

Имам же о сем два помысла: един глаголет ми, яко на умерщвление приидох зде, и аще напишу ея ради, преступлю обещания умерщвления моего; другий же: аще не напишу ея ради, преступлю заповедь, глаголющую помогати обидимым. Сотвори любовь, отче, и рцы ми, что сотворю?

Ответ. Аще бы мертв был еси, и пришла бы к тебе вдова обидима, могл ли бы, хотящ, помощи ей? Аще ли же сей и поможеши, то и другая приидет, и презрети имаши ю, и преступиши тогда заповедь. Мертвец не печется ни о чесомже таковых. Аще и поропщут на тя, то ничтоже тя вредит сие.

Вопрос 141. Брат, живущ во общежитии и служай старцу, вопроси великаго старца о своих помыслех.

Ответ. Не разумен еси, и сего ради обладают тя помыслы, паче же оправдание. Господь хощет, да имаши всякаго человека отлична от себе. Прочее покажи ему послушание во всех и сотвори что ни глаголет ти, или о ястии и питии и о коей-либо вещи, повинися ему. Аще ли же будет дело тяжко, то буди разума аввинаго, и аще что глаголет ти, сотвори; и о псалмопении и бдении, аще что глаголет ти, сотвори: и вся будут ти во спасение души. Аще и оклевещет тя, радуйся: полезно бо ти есть весьма. Аще и оскорбит тя, претерпи: «претерпевый бо до конца, той спасется» (Мф. 10, 22). О всех же благодари Бога. Благодарение бо ходатайствует о немощи пред Богом. Во всех же присно осуждай себе яко согрешающа и прельщаема, и не имать осудити тя Бог. Смирися во всех, и обрящеши благодать у Бога. Аще навыкнеши сим, поможет ти Бог обрести силу. Се бо воля Его есть, да всяк человек спасется и в познание истины приидет.

Ответ 142, тогожде великаго старца к томужде.

Брате, не попускай себе разсуждати приходящия ти помыслы, несть бо сие меры твоея, и смущают тя, якоже хотят, не познавающа хитрости их. Но аще смущают тя, рцы им: аз не вем, кто есте вы. Ведый Бог, да не оставит вас прельстити мя. И поверзи пред Богом немощь свою, глаголя: Господи, в руках Твоих есть: помози ми и изми от рук их. Коснящий же помысл и борющий тя рцы авве твоему, и со Богом исцелит тя. И о рукоделии: аще что услышиши, сотвори, и спасешися о имени Божии. О псалмех: да не оставиши учения, делание бо есть, и понудися изустно глаголати их: пользует бо тя зело. О еже услышати, яже суть паче силы твоея, да не взыщеши: имаши бо учения, еще по мере твоей пользующа тя.

Ответ 143, тогожде великаго старца к томужде.

Да не будеши поруган, о недостаточне! Не подобает веровати врагом твоим. Аще бо без попечения будеши и вознерадиши, то приидут паки. Воин бо во время мира поучается в тех, яже суть брани. Виждь, яко Господь рече змиеви: «той твою блюсти будет главу, и ты блюсти будеши его пяту» (Быт. 3, 15). До последняго убо издыхания не должен есть без попечения быти человек. Внемли убо себе, брате, от гнева, и тщеславия, и сна, и прочих страстей, ведый, яко враг не спит, ниже нерадит.

Брате, аще хощеши спастися, стяжи смирение, послушание и повиновение вольное. И егда слышиши нечто от старца, что бы ни было, рцы ему со смирением: помолися о мне, отче, яко да даст Бог разум и бодрость, да не оскорблю тя. Сия сохрани и спасешися.

148. Тойжде брат, в недуг впад и бояся умрети, просил есть, со смирением многим, тогожде великаго старца о оставлении грехов, и о терпении потребном в недузе до конца. И отвеща ему тако:

Да не скорбиши, брате: смерть, бо кроме грехов, несть смерть, но прехождение от скорби в покой, от тьмы в неизглаголанный свет и в жизнь вечную. Глаголет же ти Бог, велий Царь: отпущаются тебе вся согрешения твоя, предварительно молитвами, и моленьми святых и ради твоея в Него веры, и да подаст ти терпение до конца.

149. Тогожде к томужде великому старцу вопрос. Владыко мой отче, в руках есмь Божиих и твоих. Сотвори убо милость свою до конца со мною, и ускори отрешити мя, предая мене Владыце моему Христу и наставляя святыми твоими молитвами, и спутешествуй на воздусе и в пути сем, его-же не вем.

Ответ. Христу, изволившу умрети за нас, Владыце небесе и земли и всякаго дыхания, предаю тя, брате, да утолит пред тобою страх смерти, и безпрепятствен восход сотворит души твоея, и да сподобит со дерзновением поклонитися Святей Троице, си есть, освобожденна, боящася же и трепещуща, якоже и Ангели, и да упокоит тебе со святыми Своими. Иди убо и молися о мне.

150. Ин брат болен, и в чахотку впад и зело бедствуя, моли тогожде старца помолитися о нем и испросити ему оставление грехов.

Ответ. Да не убоишися, брате; но паче да возрадуется душа твоя и да возвеселится о Господе. И веру ми ими, о Господе, со истиною, яко се простил есть Бог вся твоя согрешения, по прошению твоему, от детска доселе. Благословен восхотевый Бог, яко простил есть тебе вся. Да не скорбиши убо, ни единоже бо зло имаши: болезнь есть, и престанет.

151. Паки отягченну ему бывшу множае, нецыи братия молиша инаго старца, сказати им оный прежде сего ответ, о животе ли рече старец или о смерти.

Ответ Иоанна. О смерти есть. Может же испросити ему живот, аще извещение приимет от Бога.

152. И сия услышавше, молиша великаго старца испросити ему живот.

Ответ. Бог мой, Благий и Милосердый, еще и еще да исполнит вы радости Святаго Духа, аминь. О брате же: довлеет ему, аще что сподобился прияти: яко внезапу богат сотворися: и от раба свободен. Но благословен благоволивый и приемый моление Бог. Ничтоже убо рцыте брату, да не оскорбится. Но вы сохраните тайну сию. Несть бо ему смерть, но прехождение от смерти в живот вечный и от скорби в покой. Радуйтеся, чада возлюбленная о Господе.

153. Паки брату отягчавшу, и зело болезнующу, молиша тогожде великаго старца, да сотворит Бог, умолен быв от него, с братом скорую милость.

Отвеща великий старец:

Сего ради замедли в болезни, да не оставит себя бывшее о нем моление: и Бог полезное ему сотворил есть и творит молитвами святых, аминь.

И по ответе сем скончася с миром брат оный.

154. Старец некий авва Евфимий безмолвствуяй, послал есть молитву сию к томужде великому старцу: да чрез него Бог сотворит к нему ответ, противу вопросов сущих в молитве.

О Светодавче! Путь сущих во тме (просвети и нас сущих во мгле), Ты бо рекл еси, Святе: «просите и приимете; толцыте и отверзется вам» (Ин. 16, 24); и понеже хощеши и нам дверь отверсти спасения, ускори, начал бо еси. Аще бо не хотел был еси нас спасти, то не бы явил еси нам, яже от нас убо не возможна: от Тебе же Бога возможна. Сказал еси нам Святе: очисти себе, аще хощеши да прииду; и аз рех, Святе, яко брение очистити себе не может. И паки рекл еси нам Владыко: хотяй Моих сподобитися дарований, да уразумеет стези Моя во всех; и како может уразумети от рождества слепый родивыйся, аще не отверзутся его очи? Слепый ищет вождя, да не како обрящет себе малое служение. Ибо сын Тимеов Вартимей, седяше при пути прося милостыни: и егда услыша яко Свет правды путем тем мимоходит, воззва, глаголя: «Сыне Давидов! помилуй мя» (Мк. 10,47), и егда умилосердися благость Твоя, и призвал еси его, и рекл еси: что хощеши да сотворю ти? Он же рече: Учителю, да прозрю; и абие благость Твоя рече: прозри: и прозре, и виде Твоя следы, и последова Тебе. И аз хощу воззвати, и претит мне присно хотяй омрачити очеса видящих. Аще хощет благость Твоя призвати и мене и рещи, что хощеши, да сотворю тебе? Воззову и аз по оному: Господи, да отверзутся мои очи. Ибо прокаженный оный, аще бы могл себе очистити, то не бы воззвал: Господи, аще хощеши, можеши мя очистити, но очищал бы сам себе. И аз по оному зову: даждь и мне тойжде святый глас: хощу, очистися, и абие отыдет от мене проказа. И прозрев очищен быв, тогда уразумею следы Твоя еже ходити в след Тебе, яко Ты еси путь заблуждших. И тебе отца моего молю: ей, отче, помолися Владыце моему Христу, да отверзет мои очи, яко тебе имам руководителя приводяща мя Владыце Иисусу, яко Тому есть слава, со Отцем и Святым Духом, во веки веков, аминь.