Текст Праздничной минеи на церковнославянском языке

О еже сподобитися нам исполнитися освящения вод сих причащением, невидимым явлением Святаго Духа Господу помолимся.

О еже услышати Господу Богу глас моления нас, грешных, и помиловати нас Господу помолимся.

О избавитися нам от всякия скорби, гнева и нужды Господу помолимся.

Заступи, спаси, помилуй и сохрани нас, Боже, Твоею Благодатию.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе, и друг друга, и весь живот наш Христу Богу предадим.

Сим глаголемым, священник тайно молитву сию глаголет:

Господи Иисусе Христе, Единородный Сыне, сый в недре Отчи, истинный Боже, Источниче Жизни и безсмертия, Свете от Света, пришедый в мир, еже просветити его, озари нашу мысль Святым Твоим Духом и приими нас, величество и благодарение Тебе приносящих о яже от века дивных Твоих великодействиих и еже в последния веки спасительном Твоем смотрении, в немже в наше немощное и нищее одеявся смешение и работным мерам снизшедый, Иже всех Царю, еще и рабскою рукою во Иордане креститися претерпел еси, да, водное естество освятив, Безгрешне, путесотвориши нам еже водою и Духом паки рождение и к первому нас устроиши свобождению. Егоже Божественнаго таинства воспоминание празднующе, молимся Тебе, Владыко Человеколюбче, воскропи и на ны, недостойныя рабы Твоя, по Божественному Твоему обещанию воду чисту, Твоего благоутробия дар, во еже над водою сею прошению нас, грешных, благоприятну быти Твоею благостию и благословению Твоему ей, нам же и всем верным людем Твоим дароватися в славу Святаго и покланяемаго Твоего Имене. Яко подобает Тебе всякая слава, честь и поклонение со Безначальным Твоим Отцем и Пресвятым, и Благим, и Животворящим Твоим Духом, ныне, и присно, и во веки веков.

И рек в себе: Аминь.

Диакону же исполнившу ектению, начинает священник велегласно молитву сию:

Велий еси, Господи, и чудна дела Твоя, и ни едино же слово довольно будет к пению чудес Твоих. (3)

Ты бо, хотением от не сущих во еже быти приведый всяческая, и Твоею державою содержиши тварь, и Твоим промыслом строиши мир, Ты, от четырех стихий тварь сочинивый, четырми времены круг лета венчал еси. Тебе трепещут умныя вся силы, Тебе поет солнце, Тебе славит луна, Тебе присутствуют звезды, Тебе слушает свет, Тебе трепещут бездны, Тебе работают источницы. Ты простерл еси небо, яко кожу, Ты утвердил еси землю на водах, Ты оградил еси море песком, Ты ко отдыханием воздух пролиял еси. Ангельския силы Тебе служат, Архангельстии лицы Тебе кланяются, многоочитии Херувими и шестокрилатии Серафими, окрест стояще и облетающе, страхом неприступныя славы Твоея покрываются. Ты бо, Бог Сый Неописанный, Безначальный же и Неизглаголанный, пришел еси на землю, зрак раба приим, в подобии человечестем быв, не бо терпел еси, Владыко, милосердия ради милости Твоея зрети от диавола мучима рода человеча, но пришел еси и спасл еси нас. Исповедуем благодать, проповедуем милость, не таим благодеяния: естества нашего роды свободил еси, девственную освятил еси утробу рождеством Твоим. Вся тварь воспевает Тя, явльшагося: Ты бо, Бог наш, на земли явился еси и с человеки пожил еси, Ты Иорданския струи освятил еси, с Небесе низпославый Святаго Твоего Духа, и главы тамо гнездящихся сокрушил еси змиев.

И сие убо священник глаголя трижды, и воду рукою благословляет на кийждо стих:

Ты убо, Человеколюбче Царю, прииди и ныне наитием Святаго Твоего Духа и освяти воду сию. (3)

И даждь ей благодать избавления, благословение Иорданово, сотвори ю нетления источник, освящения дар, грехов разрешение, недугов исцеление, демонов всегубительство, сопротивным силам неприступную, Ангельския крепости исполненную, да вси, почерпающии и причащающиися, имеют ю ко очищению душ и телес, ко исцелению страстей, ко освящению домов и ко всякой пользе изрядну. Ты бо еси Бог наш, Иже водою и Духом обновивый обетшавшее грехом естество наше. Ты еси Бог наш, водою потопивый при Нои грех. Ты еси Бог наш, Иже морем свободивый от работы фараони Моисеом род еврейский. Ты бо еси Бог наш, разразивый камень в пустыни, и потекоша воды, и потоцы наводнишася, и жаждущия люди Твоя насытивый. Ты еси Бог наш, Иже водою и огнем пременивый Илиею Израиля от прелести Вааловы.

Сам и ныне, Владыко, освяти воду сию Духом Твоим Святым. (3)

Даждь же всем, прикасающимся ей, и причащающимся, и мажущимся ею, освящение, здравие, очищение и благословение.

Спаси, Господи, и помилуй Великаго Господина и Отца нашего (имя рек), Святейшаго Патриарха Московского и всея Руси, и Преосвященнейшаго епископа (имя рек) (его же есть область). И сохрани их под кровом Твоим в мире, покори им всякаго врага и супостата, даруй им вся, яже ко спасению прошения, и жизнь вечную, да и стихиями, и человеки, и Ангелы, и видимыми, и невидимыми славится Твое Пресвятое Имя, со Отцем и Святым Духом, ныне, и присно, и во веки веков, аминь.

Священник: Мир всем.

Диакон: Главы ваша Господеви приклоните.

Священник, преклонься, молится тайно:

Приклони, Господи, ухо Твое и услыши ны, Иже во Иордане креститися изволивый и освятивый воды, благослови всех нас, иже приклонением своея выи назнаменующих работное воображение, и сподоби нас исполнитися освящения Твоего причащением воды сея, и да будет нам, Господи, во здравие души и тела.

Возглашение: Ты бо еси освящение наше, и Тебе славу, и благодарение, и поклонение возсылаем со Безначальным Твоим Отцем и Пресвятым, и Благим, и Животворящим Твоим Духом, ныне, и присно, и во веки веков, аминь.

И абие, благословляя воду крестовидно Честным Крестом, погружает его право, низводя в воду и возводя, держа его обема рукама, поя настоящий тропарь, во глас первый:

Во Иoрдане крещающуся Тебе, Господи, / Тройческое явися поклонение: / Родителев бо глас свидетельствоваше Тебе, / возлюбленнаго Тя Сына именуя, / и Дух в виде голубине / извествоваше словесе утверждение. / Явлейся Христе Боже / и мир просвещей, слава Тебе.

И в другий такожде Крестом знаменует воду, и в третий такожде, тойже тропарь поя, сам настоятель, споющим ему и прочим священником; таже поют и лики тойже тропарь. Настоятель же, взем священную воду на блюдо и обратяся на запад лицем, в левой руце держа Честный Крест, а в правой васильки, кропит крестообразно на вся страны. И приходят прежде к настоятелю священницы, два два, и целуют Честный Крест, и знаменует их васильком по лицу со священною водою крестообразно; по тому же чину и вся братия. Поется же тогда тропарь от всех, многажды, дондеже освятятся вся братия водным кроплением и причащением. И абие входим во храм, и поем стихиру.

Слава, и ныне, глас 6:

Воспоим, вернии, / еже о нас Божия благодеяния величество: / о нашем бо прегрешении быв Человек, / нашим очищением очищается во Иордане, / Един Чистый и Нетленный, / освящаяй мене и воды / и главы змиев сокрушаяй в воде. / Почерпем убо воду с веселием, братие: / благодать бо Духа верно почерпающим / невидимо подавается от Христа Бога / и Спаса душ наших.

Таже: Буди Имя Господне благословено от ныне и до века (3). И псалом 33: Благословлю Господа на всякое время:

И дается антидор от иерея и отпуст. По отпусте, или есть Литургия, или несть, поставляется свещник среди церкве. Клирицы же, ставше оба лика вкупе, поют тропарь праздника. Слава, и ныне, кондак. По скончании же кондака многолетны, якоже обычно.

И входим в трапезу, и ядим с древяномаслием, испиваем же и вина. Сыра же, и подобных ему, и рыб никакоже дерзнем ясти: возбранено бо есть Божественными правилы.

Сице бывает служба, постному дню сущу, в навечерии Просвещения.

Ведати подобает, яко праздник святых Богоявлений в кийлюбо день случится, поем повечерие великое сице:

О часе 1–м нощи бывает благовест и потом трезвон во вся кампаны. Иерей же со диаконом, облекшеся, творят начало, якоже во вся праздники Владычни. Диакон глаголет: Благослови, владыко. Иерей: Благословен Бог наш: и, кадящу иерею, глаголем повечерие великое от начала: Слава Тебе, Боже наш, слава Тебе. Царю Небесный: трисвятое, и прочая. С нами Бог: поем с пением. И вместо тропарей обычных: Просвети очи мои: глаголем тропарь праздника. И вместо: Помилуй нас, Господи, помилуй нас: глаголем кондак праздника. По: Слава в Вышних: бывает лития по обычаю.

И поем на литии стихиры самогласны, глас 4:

Космы монаха: Одеваяйся светом, яко ризою, / нас ради по нам быти сподобился eсть, / во струи одевается днесь Иoрданския, / не Сам сих ко очищению требуя, / но нам Собою устрояяй порождение. / О, чудесе / Без oгня изваряет, / и назидает без сокрушения, / и спасает в Него просвещаeмыя / Христос Бог и Спас душ наших.

Тебе, в Дусе и oгни очищающа грех мира, / зря Креститель грядуща к себе, / ужасаяся и трепеща, вопияше, глаголя: / не смею держати верх Твой пречистый, / Ты мя освяти, Владыко, / Божественным явлением Твоим, / Eдине Человеколюбче.