Текст Праздничной минеи на церковнославянском языке

И ныне:

Агница нескверная, Агнца рождшая, Слова Пребезначальнаго в последняя времена, / бяше сие чудно, Адамова внука и Давидова по достоянию; / Еяже несказанное Рождество отцев множество предпразднствует достойно.

Аще же в 24–й день, воскресен светилен не глаголется, но отцев:

От семене вводится Авраамля / и Божественнаго Давида Богоотца Пребезначальное Слово, / Иже отроки равночисленныя первее Троице / чудно Ангела сшествием из пламене спасый / и рыдание в радость преложивый жен.

Слава: Патриархов избраннии: Писан пред сим.

И ныне:

Веселися, Вифлееме, и ты, Евфрафо готовися: / Богородица бо приходит в вертепе и яслех родити Бога неизреченно. / О, страшнаго таинства / Егоже ныне Божественное Рождество Авраам, Исаак же и Иаков, / патриарси вси и пророцы светло предпразднуют / и человецы со Ангелы.

На хвалитех стихиры воскресны 4, и отцев 4.

Стихиры отцев, глас 5.

Подобен: Радуйся, постников:

Возвыси твой глас истинно, / Сионе, Божественный граде, / и проповеждь отцев Божественную память, / со Авраамом Исаака и Иакова почитающи приснославнаго, / се со Иудою и Левием величаем Моисея великаго и Аарона чуднаго / и почитаем с Давидом Иисуса и Самуила вси. / Предпразднству Христову Божественную похвалу / песньми Божественными плещуще, / яже от Него благодать улучити просим / и миру даровати велию милость.

Стих: Благословен еси, Господи Боже отец наших, / и хвально и прославлено Имя Твое во веки.

Гряди, на огненную иногда возседый, Илие, Божественную колесницу, / и Богомудре Елиссее со Езекиею во едино, / Осие, купно срадуйтеся, / честная же двоенадесятице пророков Богодохновенная, / Рождеству Христову сликовствуйте / и в песнех, вси праведнии, воспойте, / отроцы всеблаженнии, / росою Духа угасившии пламень пещный, / о нас молите Христа / низпослати душам нашим велию милость.

Стих: Яко праведн еси о всех, / яже сотворил еси нам.

Явися, Яже от века на земли / проповедаемая пророки в вещаниих, Дева Богородица, / Юже патриарси мудрии и праведных собори возвещают, / с ними же сликовствует и жен благолепие: / Сарра, Ревекка, Рахиль, и Анна же, / и славная Мариам Моисеева купно. / С сими срадуются и мира концы, / вся тварь почитает, / яко Зиждитель всех и Бог приходит плотию родитися / и даровати нам велию милость.

Слава: Законных учений:

Ины стихиры, егда не поется воскресно, глас 4.

Подобен: Званный свыше:

Исаии глас исполняется: / се бо Дева Необъятнаго, / описуемаго плотию, / во утробе носит / и преславно родити приходит. / Богоприятный вертепе, украсися, / Вифлееме, уготовися: / Царь бо тя изволи во обителище. / Приимите, ясли, / повиваема Младенца Христа, / хотяща решити пленицы согрешений человеков благостию.

Написався с рабы Владыка, / прегрешений рукописание раздрати хотя / и написати вся в книзе живущих, / умерщвленныя украдением змия. / Дева же носит Тя, вся носящаго, / плотию мертвенною обложена / и вселитися в малый вертеп благоволившаго. / Егоже, рождшася, / чини Горнии Ангельстии восхвалиша с Божественными пастыри, / дивящеся державе Твоей.

Светлый же и одушевленный облак, / дождь носящи Небесный, / сей на землю ныне предгрядет пролияти, / яко да напоит земли лице. / Весна благодати, / мысленная ластовица, / внутрь во утробе держащи, / неизглаголанным словом раждает, / зиму безбожную разоряющи, / палата, чистая и нескверная, / Царя в вертеп / привношает воплощаемаго.

Слава, глас 8:

Законных учений сословие / во плоти являет Христово Божественное Рождество, / прежде закона благодать благовествующия, / яко паче закона в вере сущия; / темже, тления изменению сущу ходатайственно, / во аде держимым душам предпроповедаху воскресения ради: / Господи, слава Тебе.

И ныне: Преблагословенна еси:

Славословие великое. По трисвятом: тропарь воскресен, ектении и отпуст. Стихиру же Евангельскую поем в притворе, и час , и совершенный отпуст.

НА ЛИТУРГИИ

Блаженны гласа на 6 и отцев песнь 3–я на 4. По входе тропарь воскресен и отцев. Слава, и ныне, кондак отцев. Прокимен, глас 4, песнь отцев: Благословен еси, Господи Боже отец наших, / и хвально и прославлено Имя Твое во веки. Стих: Яко праведн еси о всех, яже сотворил еси нам.

Апостол ко Евреем, зачало 328:

Братие, верою прииде Авраам на землю обетования, якоже на чужду, в кровы вселися со Исааком и Иаковом, снаследникома обетования тогожде. Ждаше бо основания имущаго града, емуже художник и содетель Бог. Верою приведе Авраам Исаака искушаемь, и единороднаго приношаше, обетования приемый. К немуже глаголано бысть: яко о Исааце наречет ти ся семя. Помыслив, яко и из мертвых воскресити силен есть Бог, темже того и в притчи прият. Верою о грядущих благослови Исаак Иакова и Исава. Верою, Иаков умирая, коегождо сына Иосифова благослови, и поклонися на верх жезла его. Верою, Иосиф умирая, о исхождении сынов Израилевых памятствова, и о костех своих заповеда. Верою Моисей родився сокровен бысть три месяцы от отец своих, зане видеша красно отроча, и не убояшася повеления царева. И что еще глаголю? Не достанет бо ми повествующу лета о Гедеоне, Вараце же и Сампсоне, и Иеффаи, о Давиде же и Самуиле, и о (других) пророцех, иже верою победиша царствия, содеяша правду, получиша обетования, заградиша уста львов, угасиша силу огненную, избегоша острея меча, возмогоша от немощи, быша крепцы во бранех, обратиша в бегство полки чужих. Прияша жены от воскресения мертвыя своя, инии же избиени быша, не приемше избавления, да лучшее воскресение улучат. Друзии же руганием и ранами искушение прияша, еще же и уз и темниц. Камением побиени быша, претрени быша, искушени быша, убийством меча умроша, проидоша в милотех и в козиях кожах, лишени, скорбяще, озлоблени. Ихже не бе достоин (весь) мир, в пустынях скитающеся, и в горах, и в вертепах, и в пропастех земных. И сии вси послушествани бывше верою, не прияша обетования, Богу лучшее что о нас предзревшу, да не без нас совершенство приимут.

Аллилуия, глас 4. Боже, ушима нашима услышахом, и отцы наши возвестиша нам. Стих: Спасл еси нас от стужающих нам, и ненавидящия нас посрамил еси.

Евангелие от Матфея, зачало 1:

Книга родства Иисуса Христа, Сына Давидова, Сына Авраамля. Авраам роди Исаака. Исаак же роди Иакова. Иаков же роди Иуду и братию его. Иуда же роди Фареса и Зара от Фамары. Фарес же роди Есрома. Есром же роди Арама. Арам же роди Аминадава. Аминадав же роди Наассона. Наассон же роди Салмона. Салмон же роди Вооза от Рахавы. Вооз же роди Овида от Руфы. Овид же роди Иессея. Иессей же роди Давида царя. Давид же царь роди Соломона от Уриины. Соломон же роди Ровоама. Ровоам же роди Авия. Авия же роди Асу. Аса же роди Иосафата. Иосафат же роди Иорама. Иорам же роди Озию. Озия же роди Иоафама. Иоафам же роди Ахаза. Ахаз же роди Езекию. Езекия же роди Манассию. Манассия же роди Амона. Амон же роди Иосию. Иосия же роди Иехонию и братию его, в преселение Вавилонское. По преселении же Вавилонстем, Иехония роди Салафииля. Салафииль же роди Зоровавеля. Зоровавель же роди Авиуда. Авиуд же роди Елиакима. Елиаким же роди Азора. Азор же роди Садока. Садок же роди Ахима. Ахим же роди Елиуда. Елиуд же роди Елеазара. Елеазар же роди Матфана. Матфан же роди Иакова. Иаков же роди Иосифа, мужа Мариина, из Неяже родися Иисус, глаголемый Христос. Всех же родов от Авраама до Давида, родове четыренадесяте, и от Давида до преселения Вавилонскаго, родове четыренадесяте, и от преселения Вавилонскаго до Христа, родове четыренадесяте.

Иисус Христово Рождество сице бе: обрученней убо бывши Матери Его Марии Иосифови, прежде даже не снитися има, обретеся имущи во чреве от Духа Свята. Иосиф же, муж Ея, праведен сый и, не хотя Ея обличити, восхоте тай пустити Ю. Сия же ему помыслившу, се Ангел Господень во сне явися ему, глаголя: Иосифе, сыне Давидов, не убойся прияти Мариам, жены твоея: рождшее бо ся в Ней от Духа есть Свята. Родит же Сына, и наречеши имя Ему Иисус. Той бо спасет люди Своя от грех их. Сие же все бысть, да сбудется реченное от Господа пророком, глаголющим: Се Дева во чреве приимет и родит Сына, и нарекут имя Ему Еммануил, еже есть сказаемо, с нами Бог. Востав же Иосиф от сна, сотвори, якоже повеле ему Ангел Господень, и прият Жену свою. И не знаяше Ея, дондеже роди Сына Своего первенца, и нарече имя Ему Иисус.

Причастен: Хвалите Господа с Небес, хвалите Его в Вышних. Другий: Радуйтеся, праведнии, о Господе, правым подобает похвала.

ПРЕДПРАЗДНСТВО РОЖДЕСТВА ХРИСТОВА, И ПАМЯТЬ СВЯТЫЯ ПРЕПОДОБНОМУЧЕНИЦЫ ЕВГЕНИИ

Месяца декабря в 24–й день

НА ВЕЧЕРНЕ

На Господи, воззвах: стихиры предпразднства, глас 5.

Подобен: Радуйся:

Носиши Адамов зрак, / во образе Божии Сый всесовершенный, / и хощеши руками держатися, / рукою вся содержай силою Твоею, / Чистая Всенепорочная провещаваше глаголющи: / како тя пеленами повию яко Младенца, / како сосцами питаю Тя, всяческая питающаго, / како Твоей паче ума нищете удивлюся, / како Тя Сына Моего нареку, Раба Твоя ныне сущи? / Пою, благословлю Тя, / подающаго миру велию милость.